Shillong: Hadien ka jingioh ka jingujor na ki paidbah ka thain Mawlasnai kaba hap hapoh ka Mawhati Constituency halor ka jingdon tang kawei ka Doctor ha PHC Mawlasnai kaba dei jong ka AYUSH ym jong ka MBBS, mynta ka sngi ka seng HANM Ri Bhoi District ka la leit jurip ia katei ka jaka sumar hapoh ka jingialam u Bah Woeshall Makdoh u President ka HANM na Eastern Zone haka jingiadonlang u Adhoc President ka HANM u Bah Justin Masharing nangta u Bah Khrawpyrkhat Thongni lem bad ki dkhot ka Seng.
Ha kane ka sngi ka Seng ka la kynduh ia ka Doctor jong ka AYUSH.
Ka seng ka la lap ia shibun ki jingduna ha kane ka PHC kynthup ka jingbym don Doctor MBBS bad ka jingduna ki Staff Nurse, ka jingbym don ka jingker ia ka PHC bad ka jingjulor ki jaka sah jong ki nurse bad kumjuh ruh ia ka MHIS ha kaba ki paidbah ki ju mat jingeh na ka por sha ka por tang namar bym don Doctor MBBS.
Ka Mawlasnai PHC ka ai ka jingshakri sha ki 42 tylli ki shnong bad 23 hajar ngut tam ki paidbah kiba hap ban ai jingshakri ka Mawlasnai PHC. Ka seng ka la ong ba kin sa leit kynduh ia u Myntri ba dei peit iaka ka tnat ka Koit ka Khiah jong ka Sorkar Jylla shen halor kane.
Tang doctor Ayush ha Mawlasnai kaba hap shakri 23 hajar tam ki khlieh briew
