Shillong: Ka thain Sohra ka dei ka jaka ka bym da seisoh ban thung ban tep namar ba ka long mawsiang hynrei ka don da kawei ka spah jongka pat ba ka mariang ka la ai kyrpang, bad kata ka dei ka jingthaw ba itynnad jong ka mariang kum ki lum ki wah, ki kshaid ki krem ki kroh.
Lehse bun ki mutdur ba ki shnong ha ka thain Sohra ki la kiew bha ha ka kam jngohkai, hynrei kam long kumta. Watla ki jaka sawdong ka shnong Sohra ki la kiew bha hynrei don ki shnong kiba kham pajih na ka, ki dang sah khlaw ha ka kam jngohkai namar ba kim pat lah ban thaw kabu ia ka spah jong ka mei mariang na ka daw ba ki bor sorkar ki dang leh klet.
Kawei na kine ki shnong, ka dei ka Rngimawsaw, kaba jngai tang kumba 20km eiei na Sohra shaphang sepngi. Kane ka shnong ka hap ha Hima Sohra ha ka lynti ban leit sha shnong Mawphu.
La hiar sha kane ka shnong ban lum jingtip shaphang ka trei ka ktah, ka roi ka par bad ki kam ki jam jong ki briew hynrei ha ka sngi ba ngi leit, namar ba la wan iaid lynti bad shong slem u liput ne lyoh baroh shi sngi, khlem ioh lad bha ban iohi shynna ia ka jingitynnad ki lum ki wah, ki sawdong sawkun jong kane ka shnong.
Ka shnong Rngimawsaw kaba don 65 tnum ïing ka dei kaba la rim bha bad katkum ka jingiathuh ki riew tymmen, ka kot spah snem mynshwa bad ban pynshisha ia kane, ki don ki dak ki shin kum ki maw buh shyieng, ki mawbynna bad kiwei. Uwei na ki riew rangbah ka shnong bah Enjiniar Kharmawphlang ula iathuh khyndiat katkum ka jingtip jong u shaphang kane ka shnong.
Ha kane ka shnong ki don ki skul SSA bad Katholik haduh Upper Primary ban ai ka jingshakri ha ka pule puthi ia ki nongshong shnong bad nangne pat ki mih ban leit bteng ia ka jingpule sha Laitlyndop ne sha Sohra bad sha kiwei ki jaka. Ka don ruh ka skul kaba la seng ka Ram Krishna Mission naduh mynshwa hynrei ka la khang noh namar bym thikna ki nonghikai bad mynta ka sah sa tang ka iing ba la sarang hynrei ki dieng sar kiba shna kum ki rishot, ki khnong kim pat pyut satia.
Ki briew ki im da ka rep ka riang kumba long ki nongkyndong kum ka rep phan, bad kiwei ki jait kum kiba stah maw bad don ruh kiba ri ngap. Ka shnong ka long kaba ikhuid namar ba la shna lynti baroh sawdong na ka skhim NREGS ne ka skhim 100 sngi.
Khnang ban kyntiew ia ka ioh ka kot jong ki nongshong shnong, ka shnong ka la pyrkhat mynta ban pyrshang ban phai noh sha ka kam jngohkai, namar ba ka don shibun ki jingbuh jingsat ba itynnad jong ka mariang.
U Rangbah Shnong bah Luckynos Synrem ula iathuh ba ka shnong dang shen, ka la shna ia ka surok na ka skhim 100 sngi ban poi sha ka Kshaid Noh Khiat ban khring ia ki nongwankai hynrei kim pat lah ban shna ia kane ka surok ban pynpoi sha jaka jngohkai bad kin dang bteng biang ha kine ki sngi ban wan.
Ha ka shnong ki don ka maw eit nar kaba ju sain nar ki Khasi mynshwa hynrei kaba la shah pynjulor noh ha ki phareng mynshwa bad ruh ka wah sait maw kaba ju sait ia ki maw shwa ban sain nar mynshwa.
Ka don ki krem ki kroh, kum u maw synrang miaw wa, ki maw ba la shna iing da uwei u briew hyndai, nalor kiwei pat.
Ka shnong Rngimawsaw tang kumba 20 km na Sohra, dang sah khlaw ki jaka jngohkai
