Shillong: Ka HSPDP ka la ai khublei ia ka sorkar jylla kaba la ithuh ia ka ktien Khasi kum ka ktien sorkar ha ka jylla.
U President ka HSPDP u bah KP Pangiang haba kren mynta ka sngi, ula pynpaw ba kane ka mat ka dei kaba la angnud bha ka HSPDP naduh mynshwa ha ka por ba dang im u ma Ieid Hoping Stone Lyngdoh bad haduh kine ruh.
Watla ka sienjam kaba nyngkong ka la iaid ban ithuh ia ka ktien Khasi kum ka ktien sorkar hynrei kaba donkam sa kawei ka sienjam ka long ban iakhun ban pynrung noh ha ka khyrnit ba phra ka riti synshar ka ri, khnang ba kan long ka ktien kaba ithuh ha ka ri India baroh kawei.
Hynnin ka sngi, ka sorkar MDA-2 , kala mynjur ia ka Meghalaya Official Languages Ordinace 2026 da kaba ithuh ia ka ktien Khasi bad ktien Garo kum ka ktien sorkar ha ka jylla.
Ha kawei ka liang halor u pud u saml, u bah Pangiang ula ong ba ka jingiakren ia kane ka mat ka la jrong bha kaba iaid palat 50 snem haduh mynta. Ula kyrmen bad kyntu ia ka sorkar Meghalaya bad ka sorkar Assam, ba kin pyndep noh sa 6 tylli ki jaka kiba dang sah ban pynbeit kynthup ka Langpih khamtam ba ynda la wan ka sorkar thymmai ha Assam ha ki bnai ban wan.
Halor u lumpongdeng, ka HSPDP ka la kren shai ba ka jingtei ia ka hotel kam dei ha u lumpongdeng hynrei ka sorkar ka dei ban tei ha Orchid kaba don mynta, kumba la pynshai u myntri rangbah.
U bah KP Pangiang ula ong ba ka sorkar ka dei ban pynthikna ban ym don kano kano ka jingtei ha lumpongdeng kaban ktah ia ka mariang bad haba ka ai wai ia ka jaka, kam dei ban leit duh syndon sha ka kompeni.
ka HSPDP ka don 2 ngut ki MLA bad uwei u long myntri ha kane ka sorkar MDA-2.
Ka ktien Khasi ka dei ka mat ba slem bah ka HSPDP naduh u ma Ieid Hoping: Pangiang
