Shillong: Ka Khasi Authors Society (KAS) kaba la pynkhreh shaid shaid ban pyllong ia ka jingiakhih ha ka nongbah Shillong ban pynjur iaka jingdawa ban ithuh noh ia ka ktien Khasi kum ka ktien sorkar ha ka jylla, ka la kyndit hadien ba ka sorkar ka la pynurlong ia ka jingdawa mynta ka sngi.
U myntri rangbah ka jylla u Conrad K Sangma mar mar mynta ka sngi, hadien ba la rai ka cabinet ban ithuh ia ka ktien Khasi bad Garo ha ki kam sorkar ha ka jylla, ula khot ia ki nongialam ka Khasi Authors Society ban pyntip halor kane.
Ula pyntip ha ki nongialam ka KAS ia ka rai ba la shim ka sorkar kaban sah kynmaw ha ka jylla, bad ha kajuh ka por, ka sorkar kan iai buddien ban pynrung syndon ha ka khyrnit ba phra ka riti synshar ka ri.
Ula pyntip ruh ba ha ka dorbar synra kaban sa wan, ki MLA kin sa lah ban kren da ka Khasi bad Garo nalor ka phareng. Ula pan jingkyrshan na ka Khasi Authors Society ha ka jingpynkhreh ka sorkar ban thaw ia ki rules bad ula ai khublei ia ka Khasi Authors Society na ka bynta ka jingnoh synniang ba radbah jongka kaba ialam ia ka sorkar ban shim ia kane ka rai kaba khraw.
La synran lang ha kane ka jingiakren da ki Symbud Myntri Rangbah kynthup bah Prestone Tynsong bad bah Sniawbhalang Dhar.
Katba na ka liang u President ka KAS Dr. DRL Nonglait ula iathuh ba haka jingshisha ka KAS ka la pynkhreh ban pynbna ia ka jingiakhih paidbah ha ka 18 tarik mynta u bnai ha ka jingialang ha Sohra hynrei kila lyngngoh ba ka sorkar mynta ka sngi kala shim ia ka rai halor ka jingdawa ka society bad kaba sah ka long ban ap ia ka jingpyntreikam.
U la ong ba kane ka sienjam ba la shim ka sorkar, ka dei ka jingjop jong ka KAS kaba la iakhun dohiap ha kine ki snem ban pynurlong kam ba ka ktien Khasi ka dei ban rung kum ka ktien ban pyndonkam ha ki kam sorkar nalor ka phareng.
Dang mut pynbna jingiakhih, urlong noh ka jingdawa | Khot kynduh u Conrad ia ka KAS
