Shillong: Ka Khasi Students Union (KSU) ka la ai dorkhas ha u Chief Secretary ka jylla u Dr. Shakil P. Ahammed, IAS ban dawa ba ka sorkar jylla ka dei ban tuklar mardor kumba ka la kular ban thungkam Nurse kynthei 80 percent ha NIEGRIHMS.
Nalor ka mat thung ha NEIGRIHMS, mynta ka sngi, ki nongialam ka KSU kynthup u Secretary bah Donald Thabah, u samla Reuben Najiar u Asst. General Secretary kila kynduh ia u CS bad aiti ia ka dorkhas ban pyntreikam noh ia ka amendment jong ka Meghalaya Identification, Registration (Safety & Security) of Migrant Workers Act, 2020.
Kawei pat ka long ban pynkylla ia ka rukom treikam jong ki District Selection Committee namar ba ki long kum ka ktem thungkam ia kiba iadei, kiba iajan khlem da iaid katkum ka lynti.
Ka KSU ka la dawa ruh ban sangeh mardor ban phah rwai ia ki khynnah skul ia ka “Vande Mataram”, namar ba kane kam iahap satia katkum ka jinglong ka ri India hynrei ka dei kaba iadei ia ka niam Hindu.
Kawei pat ka pat, ba ka KSU ka la buh ka long ban weng noh mardor ia kiba shong be-ain ha Mahadev Khola bad Maxwelton Estate.
Ka KSU ka la dawa na ka sorkar ba ka dei ban pyni noh da ki kam mardor halor kine ki mat khlem pynslem.
Weng ia kiba sah beain ha Mahadev, sangeh phah rwai Vande Mataram, byrthen ka KSU
