Shillong: Ka myntri ka tnad ka koit ka khiah ka jylla ka kong Ampareen Lyngdoh ka la pyntip ba ki don baroh 18 ngut kiba iap na ka jingpang Japanese Encephalitis ha ka jylla ha kine ki ar snem.
Haba jubab halor ka jingkylli kaba la wanrah ka MLA ka Ampati ka Miani D Shira hapoh ka iing dorbar, ka kong Ampareen ka la pyntip ba kiba pang na kane ka jingpang ha kine ki ar snem ka la kot sha ka 236 ngut ha kylleng ka jylla.
Ka myntri ka la ong ba ka tnad ka koit ka khiah ka la shim ia ki sienjam ban ai injek ia ki briew khnang ban iada ia kane ka jingpang. Kane ka jingpang ka kham ktah ia ki khunlung namar ba la pynsaphriang da u pyrjong.
Ia ka Japanese Encephalitis la jer kyrteng namar ba la lap nyngkong ba ka jia ha Japan hapdeng ka spah snem kaba 19 bad 20 bad ka ktah ia baroh ki ri ka Asia bad Western Pacific.
Iap 18 ngut na ka jingpang Japan ha ka jylla
