Shillong: U nongialam liangpyrshah u Dr. Mukul Sangma ula kynnoh ba ka rukom thungkam ha ka tnad pulit ka don ka jingleh shiliang ban ia kiba don ka jingiajan ne nepotism, bad ula dawa ba dei ban pyllong biang ia ka eksamin.
Haba kren sha ki lad pathai khubor ha ka sngi Palei, u Dr. Mukul ula ong ba ka jingpyniaid ia ka jingrungkam ha ka tnad pulit kaba la pynbna ha ka 6 tarik Lber, 2024, ka dei ban bud thik ia ki kyndon ka Meghalaya Police Act, 2010 bad ka Transparent Recruitment Policy. Ula kam ba ka jingmih ka jingkynrum kynram dang shen, ka la wanrah ka jingsngew khia jur ia ka jinglong khuid ka rukom pyniaid ia ka jingthungkam da ka Central Recruitment Board (CRB).
Haba kdew ia ka jingpynbna ka CRB, u Dr. Mukul ula ong ba ka jingailad ban pynbeit ia ka jingbakla ban pynrung ia ki roll number bad kiwei ki jingtip ba iadei bad ka eksamin hadien ba la dep thoh ia ka test, ka long ka bym lah ban pdiang ia ka jingkhuid bad ka jinglong shai ka rukom treikam.
Kane ka pyni ba ka lah ban don ka jingtuklar ki briew ba don ha ka bor ban pynbakla ia ka jingkhuid ka rukom thungkam bad ka donkam ban don ka jingtohkit halor kane.
U la kynnoh ruh ba la ioh jingtip ia ki briew sorkar kiba don ha ka kam, kiba iarap lem ia kito ki kandidet ha ka por ba ki thoh ia ka eksamin, bad ai ruh da ka jubab bad kane ka dei ka kam runar kaba shyrkhei.
Ula dawa ba dei ban pyllong biang ia ka eksamin bad ban pyndam noh ia ka eksamin kaba la dep bad ia ka result ruh kaba la dep ialeh, dei ban sangeh haduh ban dep ia ka jingtohkit.
Ula kynnoh ba ka bor pyniaid ia ka eksam ka la phiel ban wanrah ia ka jingshniah jong ki paidbah halor ka rukom pyniaid ia ka eksamin kam.
U Dr. Mukul u kynnoh ba thungkam ia kiba iajan ha ka tnad pulit, dawa ban pyllong eksamin biang
