SHILLONG: U MLA barim ka Mawlai uba dei ruh u nongialam ka NPP, u bah Embhahlang Syiemlieh ula ther ia u nongialam ka party VPP uba la kren hok da kaba pyndonkam ia ka ktien Blei.
Haba kren ha ka jingialang ialap ilekshon ia ka Kyrtong ka NPP ka jong Ampareen Lyngdoh ba long ha Jaiawpdeng mynta ka 8 tarik Iaiong 2024, u bah Embhah u la ong une u nongialam kat shaba don ki jingialang u kren ia ka ktien Blei hynrei kaba lyngngoh ba ha man ki jingialang u kynnoh u sin ia kiwei ki nongialam jong kiwei ki party. Kane kadei ka jinglong arsap jong u kum u nongialam.
U bah Embhah u la takrain ruh ia ka jingpynlong drama ka VPP hapoh Iing Dorbar Thawain hadien ba u Lat ka jylla u kren da ka ktien Hindi. Ha katei ka por ki pynrem ia u Lat ba u kren ktien Hindi. Hynrei ha kine ki khyndiat sngi ha ka jingleit thep kyrteng u Kyrtong ka VPP, ki kyntien ba mih ka long ‘ Ka VPP kam pyrshah ktien Hindi’.
Une u nongialam ka NPP u la ther tyngeh ruh ia u nongialam ka VPP namar mynshwa haba u seng ia ka ‘Revolution ban iada la ka ri’, u kam ba kane ka Revolution ka long na bynta ban iarap bad ai kam para Khasi bad ban iada para Khasi.
Shuh shuh ula pynpaw ia ka jingsngewsih namar ba ki kyntien jong ki nongkyrshan u Prah ha ki Social Media ki long ki kyntien kiba ktah ia ka akor burom ki longkmie.
Ha kajuh ka por u a ther ia ka Congress watla la 15 snem u la mihkhmat sha Parliament hynrei ym shym la iohi eiei ia ki kam ban wanrah jingmyntoi ia ka jylla.
Ki kyntien ki nongkyrshan Prah ha Social Media kiba ktah ia ka burom ka akor ka jaitbynriew, ong bah Embhah
