SHILLONG:Ki nongialam ka UDP bad HSPDP mynta ka sngi ki la hiar sha Tyrsad na bynta ban ialap ia u kyrtong ka Regional Democratic Alliance (RDA) u bah Robertjune Kharjahrin
Ki nongialam haba kren ha kane ka sngi, kila sei ia ki nia hakhmat ki paidbah ba ki dei ban husiar ban jied ia u MP, ym da kaba shongshit ne shah pynshad ha kiwei kiba thmu ban ialam bakla bad pynsngewthuh bakla ia ki paidbah.
U bah Titosstar Chyne haba kren ha ka jingialang ialap ilekshon ia u kyrtong ka RDA u bah Robertjune Kharjahrin ha Tyrsad, u la ong ba ka jingbym lah ka sorkar India ban pyntreikam ia ka ILP ha kane ka jylla kadei namar ba u MP ba mihkhmat sha Parliament udei u briew uba tlot ka sur.
” Ka daw ba ka sorkar India kam shym la pyntreikam ia ka ILP kadei namar ba u nongmihkhmat u MP jong ngi u tlot, namarkata ngi donkam ia u briew uba khlain ka sur sha Parliament,” ong u bah Titoss.
U la ong ba haba khein ia ka jingioh vote ka UDP bad HSPDP, ka RDA kadei kadei kaba don bun vote ha ka ilekshon ba ladep. Halor kane ka nongrim, kum ki ar tylli ki party ki la iatreilang ban iakhun ia ka MP.
Ubah Titosstar ula ong ba nalor bun kiwei ki mat, ka RDA kala buh ruh ia ka thong ban iasaid ha ka sorkar pdeng ban ithuh noh ia ki niam tynrai khnang ba kin ioh ia ki jingmyntoi kumba long lem kiwei ki rit paid.
Katba u bah Panbor ula kynthah ia u President ka VPP u bah Ardent M Basaiawmoit ba um pat lah ban kit ia ka jingkit ka jaitbynriew namar ba haba u shimti kum u President ka HSPDP mynshwa, u iehnoh tang Ar snem eiei bad kane ka pyni ba um pat bit nalor ba ula kylla nongrim nawei shawei.
U bah Beyond ula kyntu ia ki paidbah ba kin ai ka jingkyrshan kumba la dep ha ka MLA ruh, khnang ba u kyrtong ka RDA un poi sha ka thong.
U bah Nujorki ula ong ba kane ka dei ka elekshon kaba khampher namar ba ki paidbah na Jaintia Hills kila kham sngewthuh shaphang ka elekshon MP bad ka don jingkyrmen ba u kyrtong ka RDA un poi sha ka thong.
Ki nongialam kiba don bynta ha kane ka jingialang ki kynthup u MLA barim ka Mawphlang u Eugeneson Lyngdoh ryngkat u MLA bah Beyond Kurbah nalor u MLA ka Mookaiaw u bah Nujorki Sungoh bad kiwei kila hiar sha Tyrsad ban ialap elekshon ia u kyrtong MP ka Regional Democratic Alliance RDA u bah Robertjune Kharjahrin.
Kiwei ki nongkren ha kane ka sngi, ki la kyntu ia ki paidbah ban phikir khamtam ka jingkynnoh ka seng thymmai ka Voice of the People Party VPP pyrshah ia ki seng riewlum.
Hiar ki nongialam UDP bad HSPDP kynthup u MLA ka Mookaiaw bad u Eugeneson ha Tyrsad
