SHILLONG: Ka Organising Committee jong ka KSU Mawlai circle myn ha ka 12.12.2023 ka la pyllong ka jingkhynra ia ki mynder ba wan bylla ha ki bynta bapher bapher jong ka shnong Mawlai.
Ha katei ka jingkhynra na ka liang ka seng na ki thaiñ Mawiong,Nongkwar bad ïew rynghep ka la lap ia shibun ki mynder kiba wan ban trei ia ki kam ñiat rong, tah tiles bad kiwei ki kam trei misteri ki bym biang bad bym don kino kino ki kot ki sla khamtam ka work permit, naka liang ka seng ka hadien ba ka la lap ia ki mynder bym don ki kot ki sla ba biang ka la pynher krad lut bad pynphai sha ka jaka kaba ki wan bad ka la maham tyngeh ba kim bit ban dang wan trei wan ktah hapoh ka shnong Mawlai bad ha Ri khasi hi baroh kawei.
Na ka liang ka KSU Mawlai circle ka sngew ban kyntu ia baroh ki trai ïing, contractor bad sha baroh ki para ri ba ki dei ban kiar na ka jingaikam aijam ia ki mynder namar kane kan nang pyn kharoi shuh shuh ia ki mynder ri hangne ha ri jong ngi bad kan buh jingma ia ka ri bad ka Jaidbynriew hi baroh kawei, namar ba lada ki mynder ki wan sha ka ri jong ngi lada kim ioh ki kam ki jam ba kin Im bad kamai ja kpoh kin nym lah ban shong bad ban sah hangne ha ri jong ngi.
Kyntang iawai ka seng ka iawer ia baroh ki para ri ban sangeh noh ban ai kam ia ki briew ba na bar bad ban sdang ai kam para khasi kum shi bynta ba ngin ialeh pyrshah bad iada ia ka jingsdang ban wan buhai shnong ki mynder ri hapoh ka ri baieid jong ngi.
Ia kane ka kyrwoh la pyllait da u samla Macdonald Jitem Assistant General secretary KSU Mawlai circle.