Shillong: Ka Riat Laban Dorbar Pyllun ka la dep khot jingialang jingsngap paidbah bunsien halor ka jingwanrah ka sorkar ia ka Shillong Ropeway ban pyniaid na Lum Shyllong.
Dang shen ha kane ka sngi Saitjain ka 8 tarik Nailar 2026, ka tnad jngohkai ka jylla ka la leit jurip ia ka jinglong jingman ha katei ka thain ban tip ka long kumno hadien ba ka la don ki katto katne kiba la pynpaw ia ka jingpyrshah ia kane ka projek khamtam ka jingpom ia ki dieng kaba lah ban ktah ia ki tyllong um.
U Bah Iosterson Sun, President ka Riat Laban Dorbar Pyllun ula ong ba Dorbar Pyllun kaba peit bad sumar ïa ka Shillong View Point, kim don kano kano ka jingpyrshah ïa ka projek.
U la ong ba ka Dorbar Pyllun ka sngewkmen ba kane ka projek kan wanrah ïa ka jingkiew ha ka kam jngohkai pyrthei bad kan pynsuk ïa ki nongwan jngohkai ban leit sha Shillong View Point.
Ka Kong Rosette M. Kurbah, ka Joint Secretary ka Tourism Department, u la pynshai halor ki jingpynpaw khlem jingsngewthuh shaphang ka jingtei ïa ka Shillong Ropeway, khamtam halor ka tyllong um, ki dieng bad ka jingpynjulor ïa ka mariang.
Ka la pynshai ba ki dieng kiba la pom ki dei tang kiba don ha ki jaka jong ki 6 tylli ki station, ha kaba kawei ka station ka donkam ka jaka kaba 12 meter x 12 meter. La pyntip ba la pom 544 tylli ki dieng bad la dep thung 5,044 tylli ki dieng, kata ha ka ratio 1:10, ha ki jaka kiba ka sorkar ka la thied.
Ha kane ka sngi, la ioh ruh ia ka jingpynshai na ki ophisar ka Shillong Municipal Board bad ka tnad PHE.