Shillong: Ki nongrep kila dap da ka jingsngew kthang ba ka um syep ba ki trei shitom ka la shu sepei kumba hoit sha madan namar ba ka dor kam iapher than lada bret noh sha lyngkha ruh, namar ba kam iahap shuh.
Ha ka jingiakynduh u nonglum khubor ia kine ki nongrep ka thain Nongthliew, East Khasi Hills, kila khñi iam namar ba u muli saw la thied tang 2-4 tyngka shi kilo, ka bym iahap eiei shuh bad ka jinglut kaba ki la durut.
Kila pyni ruh ba kila bret noh ia u muli sha lum ba un pyut namar ba wat ki sniang ruh kim lah bam shuh na ka jingtad dukhi ka dor.
U bah Basling Warjri, kong Pakon Mawlong bad bah Angelbert Pathaw ki la pynpaw ia ka jingsngewsih kthang halor ka jingtad dor u muli saw haduh katta katta.
La iathuh ba ki dalal bad ki buh dor ma ki, bad ki nongrep ki hap ban ai beit lada ym ai, ki mar rep hap ban shu bret biang sha lum.
Ia une u muli saw na thain Nongthliew, la wan thied ki dalal ban leit die sha Assam bad u kham duna ban wan poi sha iewduh.
Kawei pat kaba ktah bha ka dei ka jingshah ot kilo, namar ba ki dalal ki ot 1 kilo na ka 10 kilo bad lada 100 kilo, la shah ot haduh 10 kilo bad 1000 kilo, la shah ot 100 kilo.
Katba uwei pat u nongrep bah Angelbert Pathaw ula ong ba ka dor kam iahap shuh tangba ym don lad shaei ban leit bad hap ban shu ai beit katba pan dor ki dalal.
Katkum ka jingiakren kine ki nongrep, kila ong ba lada ka dor ka poi 15-10 tyngka shi kilo, ka la lait na ka jinglut bad kla kyrpad ia ka sorkar ba kan leh eiei ban thaw lad ba kin lait na ka jingeh.
Ki sniang ruh ym lah bam shuh, hap bret noh ki nongrep sha lum ia u ‘muli saw’ ha Nongthliew
