Shillong: U MDC ka Laban-Mawprem bah Ricky Shullai bad u bah Sanbor Shullai, u MLA kila iapher jingmut halor ka United Khasi and Jaintia Hills Autonomous District Council (Trading by Non-Tribals) Amendment Bill 2026.
Ka Executive Committee ka KHADC kaba ialam ka VPP ha ka dorbar dang shen, ka la wanrah ia ka jingpynkylla ia ka Section 2 jong kane ka Bill da kaba bsuh sa ia ka kyndon 7 da kaba pynrung ia ka kyntien Non-Tribal Employees Service License, kaba mut ba ki bar jylla ki hap ban shim Service License haba ki wan trei ha kano kano ka kompeni ne ha ki briew.
Ia kane ka Bill la mynjur ka dorbar ka KHADC.
Hynrei dang shen u MLA ka South Shillong uba dei ruh u myntri sorkar, bah Sanbor Shullai, ula leit ujor sha u Lat ka jylla pyrshah ia kane ka Bill da kaba kam, ba kam long kaba shong nongrim katkum ka riti synshar ka ri.
Halor kane, u MDC ka Laban-Mawprem, u bah Ricky Shullai ula mih ban pynshai kum u MDC watla um don ha ka liangsynshar ruh, ba ka jingpyrshah u bah Sanbor kam long kaba shongnia.
U bah Ricky u la pynshai ba ki jingpynkylla ia kane ka Bill kam mut ban khang sbak ïa ki nongtrei kiba ym dei ki riewlum hynrei ka dei shi bynta ban lap ia kiba wan trei nabar ba ki dei ban ioh ia ka Service License.
U MDC ka Laban-Mawprem u la pynshai ba ka Bill kam dei kaba thymmai hynrei ka dei tang ka jingpynkylla ïa ka aiñ kaba la don lypa bad ka thmu ban pynbha bad peit bniah bad ym ban khang ïa ka kam kaba hok bad ka dei katkum ki kyndon jong ka Sixth Schedule jong ka Riti Synshar.
U bah Ricky ula ong ba ha ka ain kaba rim ka Labour License, u rangbah shnong um don bynta eiei hynrei ha kane ka bill ba mynta, la ai bor ba u rangbah shnong ban pynshisha ia kano kano ka shlem treikam ba ka don ba u ne ka bar jylla ki trei.
Iapher jingmut u bah Sanbor bad u bah Ricky halor ka Bill ka KHADC
