Shillong: U MLA ka NPP na Umsning u Dr. Celestine Lyngdoh ula kynthah ia ka seng sain pyrthei, ka VPP ba ka jingkynnoh jongka, ba ka sorkar MDA kaba ialam ka NPP kam leh eiei halor u pud u sam bad ka sorkar bamsap.
Haba kren haka jingialang paidbah ha Mawkyrwat mynta ka sngi, u Dr. Celestine ula ong ba ka jingkynnoh ba ka sorkar MDA kam leh eiei, ka dei tang ka jingkren lait jynhaw.
Haba pynphai nia ia kiba kynthah ia ka NPP, u Dr. Celestine ula ong ba ha ki rynsan social media, la ju mih ki kynthoh ne comment ba kino kino kiba kren ban iaroh ia ka sorkar bad ban kyrshan ia ka NPP, kin shah kynnoh ba kila shah thied bad kila ioh pisa shi byrni.
Ula ong ba uwei u nongialap elekshon ka VPP, ula kynthoh ba kiba kito ki bym kyrshan ia ka VPP, ki dei ki nongshun, bad kane ka dei kaba bakla bad ula kam ba ka NPP kan ym khot nongshun ia kito ki bym kyrshan ruh namar ka ieng ha ka nongrim.
Ha kajuh ka por, ula kynthah ia ka jingkam ka VPP ba kan wanrah ia ka jingiatylli u paid bynriew katba u EM uba dei u MDC na Mawkyrwat ula risain. Ula buh jingkylli kumno kat u EM un shu risain khlem ka daw, bad ula buh jingkylli, hato kata mo ka jingiatylli haba tang para maki ruh kim don ka jingiatylli.
Ha kajuh ka por, u la ong ba dei ha kane ka sorkar MDA ba napdeng ki 12 tylli ki jaka kiba iakajia bad ka Assam, ka sorkar ka la lah ban pynbeit 6 tylli bad sah sa 6 tylli.
U la ong ba ki paidbah kim dei kiba matlah ban shu shah ialam bakla ha ki nia bym shong nongrim. Ula ong ba lada dei ba ka ILP ka hap ha ka bor ka sorkar jylla, la dep ai naduh mynno hynrei namar ba ka dei ha ka bor ka sorkar pdeng, ka sorkar jylla ka dang iakhun ban ioh ia ka.
Lada kyrshan ia ka NPP, Kin ong u la ioh pisa shi byrni, Kat u EM u risain khlem ka daw ?: Dr. Celestine
