Shillong: U kyrtong MP shiteng samoi ka UDP sha Lok Sabha na Shillong, u bah Vivanstone G Kharngapkynta ula kren danda don jingmut da kaba ong ba kum u briew uba dei na Sohra kaba pawnam na ka jingjur slap tam ha ka pyrthei, u ju rah lang ia u slap jingkyrkhuh kat shaba leit.
Ia kane ula pynpaw ha ka jingialang ka UDP ha Mawngap ha ka sngi Baar kaba dei ka jingialang ban pynithuh ia u kum u kyrtong ia ki nongkitkam bad ki nongialam ka UDP shi bynta jong ka jingpynkhreh ia ka elekshon MP.
U bah Vivanstone ula ong ba kane ka ri Khasi-Jaintia ka dei kajuh kumba long ha Jammu and Kashmir, ha kaba ia ka khyndew ka shyiap, la long trai da u paidbah, ym da ka sorkar, hynrei ha kine ki sngi, ka la don ka jingsynjor ia kane, kaba buh jingma ia ka jaitbynriew lada ym don u nongiasaid bat bit.
U bah Vivanstone u la ong ba ki paidbah kim dei ban siew khajna sha ka Municipal namar ha kane ka jylla, la hap ha ka Sixth Schedule bad kiba hap siew dei tang kito kiba hap ha jaka sorkar ne European Ward.
Ha kajuh ka por, u la ong ba ka aiñ tih marpohkhyndew lane ka Mines and Minerals (Development and Regulation) Act, 1957 kadei kaba la pyntreikam bakla da ka Sorkar Jylla naduh u snem 2016.
U la ong ba ha ka por ba long Myntri u Camptain Williamson Sangma, ka la don ka shithi na u Myntri ka Sorkar pdeng ba khmih ïa ka tnat Energy, kaba ong ba sa shisien u pynthikna ba ka Sorkar India kam don jingthmu eiei ban pynthut ïa ka dustur bad tynrai kaba dei hok jong ki riewlum.
U la ong ka MMDR Act kam treikam sha rilum Khasi-Jaiñtia namar ba ka Meghalaya ka dei ka Jylla ki riewlum bad kaba hap hapoh ka Khyrnit ba Hynriew.
Nalor kane u Kyrtong ka UDP u la ong ruh ba lada u ïohlad ban mihkhmat sha Parliament un pynkhlaiñ bor ïa ki District Council lyngba ka Sixth Schedule bad un ïasaid ruh ban don u nongbishar ha Supreme Court na Meghalaya.
‘Nga dei na Sohra, katba shaba leit nga rah lang ia u slap jingkyrkhu’, ong bah Vivanstone
