Shillong: Ka Hynñiewtrep Youths’ Council Diengiei Circle hapoh ka jingialam u Vice-President, Samla Sondalsik Lyngkhoi ha ka 12/06/2026 ka la leit jurip ïa ka jingpyntrei ïa ka surok Mawlaingut sha Lawmei kaba la mang T. 2,60,00,000/ (Ar klur hynriew phew lak).
Ka jingleit jurip jong ka Seng ka long hadien ba la ioh pdiang ia ka jingujor na kiba bun halor ka jingpyntrei ia kane ka surok ka bym la long katkum kaei kaba la mang da ka sorkar.
Ka Seng ka la kam ba lap ba ia ki nala bad ia ki kynroh ym shym la shna katkum ka jingmang pisa. Katkum ka jingtip ba la lap lyngba ka RTI, la mang ban pyntrei 6 tylli ki kynroh kaba la mang haduh Rs. 26.96 lak hynrei ka seng ka lap ba ïa ka kynroh la pyntrei tang kawei.
Ka Seng ha ka RTI ka lap ruh ba la mang ban pyntrei ruh ïa ka nala ha shi lynter jong ka surok kaba jrong 5Km, hynrei ka seng ka la lap ba ym shym la trei satia ïa kane ka nala ruh.
Shuh shuh, katkum ka jingtip ba la ioh lyngba ka RTI ka seng ka la lap ba la mang ïa ka jingtih khyndew ha ka dor Rs. 10.27 lak. Hynrei haba jurip kam shym la don kano kano ka dak tih khyndew.
Halor kane, na ka liang ka HYC Diengiei Circle ka dawa na ka PWD Mawphlang Division ban pyntrei ia katei ka surok katkum ka jingmang ne Estimate bad ka la pan jingpynshai ruh halor ka jingbym pyntrei katkum ka Estimate ba la buh. Lada ka PWD Mawphlang Division kam shym la pyntrei kumba la mang, ka Seng kan sa ïai bteng ban buddien.