Shillong: Ka sorkar jylla ka la map noh shisien tnok lano ne One Time Settlement (OTS) ia baroh ki kali kamai kiba khlem siew ia khajna bad kumjuh kiba shah dain kuna na ka jingbym biang ki kot ki sla, ka jinglong ka kali.
Kane ka jingmap kan treikam noh mardor haduh ka 31 tarik Nailar mynta u snem 2026.
Kane ka jingmab ka sorkar ka long 80 percent ia ka khajna kali bad kit mar bad 90 percent ia ka khajna jingbit jingbiang ki kali.
Lyngba kane ka jingmap noh ia ka khajna, bad kiwei ki jingsiew, ka sorkar kan duh kumba 800 klur tyngka eiei na kaba dei ban ioh 1100 klur.
Katkum ka jingiathuh u symbud myntri rangbah ka jylla ba peit ia ka tnad ka kit ka bah, u bah Sniawbhalang Dhar, ki don 65 hajar ki kali bym siew ia ka motor vehicle tax, ki don 12642 ki bym siew ia ka goods and passenger tax bad 57 hajar tylli ki bym siew ia ka fitness.
Kane ka sienjam ka long ban iarap ia ki trai kali kiba sah ram shibun ban siew ia ka khajna sha ka sorkar ha kine ki snem ba la leit.
Kumba 800 klur map khajna ka sorkar ia 1 lak tam ki kali kamai bym siew nalor ka kuna
