Shillong: Mynta ka sngi, ki pulit ryngkat ki masjitor bad doctor kila pyllong ia ka jingkhlong biang ia ka met u bah Throphimos Khongmawloh 30 snem ha Pynter bad la leh ruh ia ka post mortem ha katei ka jaka.
Kane ka la long hadien shi bnai tam ba ula khlad bad tep ha katei ka shnong kaba la jia ha ka 7 tarik Iaiong 2026.
Lah ban kdew ba u bah Netnobiweit Khongsdoh kum u kpa u la ujor ejahar hadien ba u khun jongu, u bah Throphimos Khongmawloh ula khlad da kaba kynnoh ba ula shah tied shah bom ha u rangbah shnong ka Pynter bad ki Village Defence Party (VDP) ha ka 7 tarik Iaiong, 2026. Ia une ula leh hadien ba la iohi ha ka video kaba la saphriang ha rynsan social media.
U SP ka East Khasi Hills u bah Vivek Syiem ula ong ba ia ka met jongu, la khlong biang mynta ka sngi bad la leh ruh ia ka post mortem ha katei ka jaka ba tep hi.
U la ong ba ki pulit ki dang tohkit ia kane ka kam bad ka jingshim jamin lypa ki 11 ngut ka paw ba ki don ha katei ka jaka ba don ka jingjia bad ka jingtohkit kan sa wad bniah halor kane. Ula ong ba yn eksamin ruh ia ka video kaba la ioh ring ha ka por ba tied ba shoh ia u.
Katkum ka jingong u SP, lada lap ia ka daw ba ki 11 ngut ki don donkti ha ka kam kaba ialam sha ka jingiap u bah Throphimos Khongmawloh, lah ban pan jingbit na ka Kashari ban weng noh ia ka jamin.
Haba kylli, u SP u la ong ba katkum ka jingtohkit ba la sdang, ka don ka jingshisha ba u la shah shoh, bad ki don ki daw ba la hap ban tuklar da u Rangbah Shnong bad ki VDP, hynrei ban tip pat la ka jingïap ka dei namar ka jingshah shoh ne da kiwei ki daw yn sa tip kham bniah hadien ba la ïoh ïa la post mortem.
Hadien 1 bnai la khlong biang ia ka met| ka post mortem kan iathuh u iap kumno:SP
