Shillong: U President ka VPP u bah Ardent Miller Basaiawmoit ula ther tyngeh ia ka sorkar Meghalaya Democratic Alliance (MDA)-2 kaba khot leh mynleh ia ka All Party Meeting ban iakren ia ka kaiphod ka Expert Committee jong ka State Reservation Policy.
Haba kren ha ka jingialang ka VPP ha Mawlai ha ka janmiet sngi Palei, u bah Ardent ula ong ba ula rah ia kane ka mat hapoh ka iing dorbar hynrei ym don ba kyrshan satia na kiwei ki seng.
Haba pynshai halor ka jingbym treh leit ka VPP sha ka jingialang ka All Party Meeting, u bah Ardent ula ong ba ynda ka VPP ka la dawa ba dei ban pyndep ia ki mat mardor, bad hadien ba la iohi ia ka jingshlei u paidbah, ka sorkar ka la pyrkhat ban pynphai noh ia ka jingmut jingpyrkhat, ka la khot leh mynleh ia ka All Party Meeting ban iakren ia ka Reservation Policy.
U bah Ardent ula ther, haduh katno ka VPP kan biej ia kane ka buit arsap jongki, balei ban leit pyllut por ban pyllut bai sha ha Secretariat, haba la tip ba kim nud ban leh eiei bad kam poi shaei shaei ruh. Ula ong ba wat pynbiej ia u rang. U la ong ba ka VPP ka la dep kren ba ai beit 40 ia u Garo bad 47 ia u Khasi-Jaintia, kata ka la biang.
Lah ban kdew ba ka sorkar ka la khot jingialang ka All Party Meeting ha ka 6 tarik ia ki seng sain pyrthei ban iakren ia ka kaiphod ka Reservation Policy kaba la aiti ka Expert Committee.
Balei phin khot ia ngi, ngim dei ki biej, shu ai beit 47 ia u Khasi, 40 ia u Garo: Ardent
