Shillong: U nongialam barim ka seng HSPDP uba dei ruh u kyrteng ha ka elekshon ba la dep na Mawkyrwat konstitwensi, u bah Poland Sohphoh ula rung sha ka NPP ryngkat ki nongkyrshan jongu ha ka jingialang ha Mawkyrwat ha kane ka sngi Saitjain.
Haba kren halor kane, u bah Poland ula ong ba ka daw kaba la pyllong ia u ban rung sha ka NPP, kaba ialam ia ka sorkar, ka dei namar ba haba u peit ia ka jingsynshar khadar ha ka jingialam u Myntri Rangbah u Conrad Sangma bad symbud myntri rangbah bah Prestone Tynsong bad kiwei, ka sorkar ka bit ka biang, bad ym donkam eh ban ia wohdong wohnia ia ka sorkar kaba long kum ka kmie.
U la ong ba kaba donkam ia u paidbah ka long ban ai ka jingiatreilang bad ka sorkar bad kam poi shano shano lada shu iawohdong wohnia.
U la ong ba kaba bha eh ka long ban don ha ka sorkar bad watla um ioh tiket ruh ym lei lei ei bad lada ioh mano mano ruh biang beit.
Katkum ka jingong u bah Poland, ki jingdonkam ba kham kyrkieh jong ka District South West Khasi Hills, ka long ka surok na Weiloi sha Mawkyrwat bad kawei pat, ki surok ban iakynduh na South West, sha West bad Eastern West Khasi Hills district bad kumjuh ia ki jaka sumar bad ki skul. U la ong kumba long mynta ka sorkar ka kular ban ai ka jingshakri kaba kham bha ia ki nonghikai skul.
Ym dei ban shu wohdong, ka sorkar ka dei ka kmie, ong u nongialam barim ka HSPDP hadien ba rung NPP
