Shillong: Kumba 10 snem eiei mynshwa ka thain Mawngap, Rangshken, Mawkdung shaduh Sohiong ka ju thnem bha ka iaid ka ieng ki kali kiba wan tuid na thain West Khasi Hills naduh Garo Hills kiba wan kiew sha Shillong bad kiba leit phai ruh kumjuh.
Bunsien haba iakynduh ki kali heh, hap ban ia ieng bad pynsuki jai ban ia ai jaka namar ka jingkhim bad khapngiah ka surok.
Hynrei kane ka surok mynta ka la kynjah bad ka la kylla kum ka surok shnong namar ba ki kali ki duna ban iaid ban ieng naduh ba la mih ka surokbah Two Lane kaba iaid lait noh ia kine ki shnong. La ioh ban iaid lyngba ia kane ka surok hadien bun snem, bad la iohi ia ka jingkynjah na ka jingduna ki kali watla ka surok ka long kabab ha.
Ka jingwan ka surok Two Lane ka la wanrah shibun ka jingaram ha ka leit ka wan ia ki paidbah naduh Shillong shaduh Nongstoin ter ter, namar ka surok rim ka long kaba kham kyllain bad kaba rit bad khim.
Ka surokbah two lane, ym tang ba ka pynsuk ia ka leit ka wan bad pynduna bun ia ka jingslem, hynrei ka la wanrah ruh shibun ka jingkylla ha ka ioh ka kot jong ki briew.
Kylla surok shnong ka surokbah barim sha Nongstoin na Mawngap sha Sohiong
