Babu Kular Khongjirem.
Hadien ka jingialang paidbah ba la lum bad pynlong da ka party VPP da kaba sdang napoh Motphran,Shillong bad bteng pat ter ter sha kylleng ki nongheh (District headquarters) bapher bapher jong ka Ri Khasi-Jaintia, ka la mih kawei ka rai kut jongmut(resolution) na man la ki jingialang paidbah jongki ba, ki paidbah, ym shuh da ki phew hajar hynrei da ki lak ngut kin ia mih ryntih lang ban leit tur paidbah bad kerkut syndon sha jaka treikam ka sorkar (Main Secretariat) ha kano kano ka sngi ba katei ka political party kan sa pynbeit bad buh sngi ban leit tur khnang ban ioh pynlong kam noh (expedite) ia kito ki mat jingdawa jong ka party VPP ba ka la pashat sha ki paidbah.
Lada katei ka rai ka la long shisha ka rai Rangbah(kam dei ban shu long kamkai ne shu long kam biria) bad kan urlong shisha kumba la thmu ne rai, kan don ka jingktah (great impact) ia ka sorkar MDA-2 bad ia ka jylla Meghalaya jong ngi hi baroh kawei.Ka sorkar ka lah ban sa khyllem noh da ka bor jong ki paidbah kumba long ha ri Bangladesh, Nepal,etc.Ym tang ba ka sorkar kan sa khyllem, hynrei ki nongialam kane ka sorkar ruh ki lah ban jah kyrteng noh syndon ha ki kam paidbah (public affairs) kumba phet rieh ki nongsynshar ha Bangladesh, Nepal,etc. Hynrei, namar ba hangne pat ka dei ka sorkar jylla,(state govt), ka bor synshar jong ka sorkar India ka lah ban pynjari shwa da ka President’Rule kumba long ka jinglong (situation)ha ki jylla Manipur,tangba kane ka rukom synshar kan neh(remains in force) tang hapoh 6 bnai. Ka sorkar India ka lah ban bteng biang sa 6 bnai lada ym pat lah ban thaw ia ka sorkar(elected govt) hynrei ym shuh ban bteng haduh 3 sien lai wat.Lada ka jinglong ka la kylla long shisha sha ka jinglong bym lah shuh ban tem bad ban thaw sorkar biang, ia ka Assembly lah ban pynwai noh(dissolved) bad yn sa pynlong noh da ka Elekshon kaba thymmai (fresh Election).
Lada ka jia shisha kumta,ba ka party VPP kan nud ban leh shisha ban leit tur(gheroa) sha Secretariat kumba ka la rai(resolved),kata, ka sorkar MDA-2 kan sa khyllem noh bad ka elekshon thymmai kan nym lah shuh ban ap haduh u snem 2028 hynrei ka lah ban long kloi noh malu mala ha u snem 2027.Kata,kumba la pynbna hi da ki nongialam ka party VPP ba ki paidbah ki la sngew slem bad sngew jlan palat ban ap ia ka Assembly Elekshon kat haduh ban da poi u 2028 namar ba ki la ngiah bad kdang hi shoin ia ka rukom synshar jong kane ka sorkar ka bym don policy ne program bad buit thymmai(no new policy/programs/strategies) hynrei da kijuh shi kijuh ki rukom pyrkhat bad da ki juh shi kijuh ki briew (same MLAs/Ministers) da ki 20 ne 30 snem mynta.
Tangba katei ka rai(resolution) kan long ruh ka jingtynjuh(test) ia ka party VPP. Hato,kane ka party ka lah shisha ne em ban pyniatylli ia ki paidbah ka ri Khasi-Jaintia kumba ka angnud? Hato, ki paidbah kin ia mih shisha ne em kumba shi lak tam ei ei kumba ka thmu ka party VPP?Hato, Ynda la ia lum ha Secretariat,jop ki pulit(govt) ne jop shisha ki paidbah ne?Hato,kat kata ka jingiakhih paidbah kaba heh bha (big mass movement),haduh katno ngut kan jia ia ki paidbah ba ia khih? Hato,kaba kum kata ka jingia khih kan wanrah shisha ne em ka jingmyntoi ne kan ialam pynban sha ka jingshah tim ia ka jylla jongngi? Kine ki long tang katto katne ki jingmaham ba dei ban ia pyrkhat lypa ba ioh ka kylla long pynban ka jingbabe hadien habud. Tangba, kito ki nongpyniaid kam sorkar kiba bat ia ki kyrdan ba heh jongka sorkar kum ki IAS/MCS/IPS,etc (high levels ) ki bym dei satia ki trai muluk bad trai jaka ki la sdang kyiuh thot thot bad peitngor bha (observe) myntra halor kane ka jinglong (present situation).Tang ka por kaba lah ban batai ia kine kiei kiei baroh.
Hato,! Lah ban long kloi noh ka MLA Elekshon ha Meghalaya?
