Shillong: Ka jingiaid kjat na Mawphlang sha Lad Mawphlang, ka long shisha kaba phylla ban lap ia ka jingstad u David Scott ha kito ki por, ban shna lynti kulai lyngba ki them, ki riat bad ki wah.
Mar ia noh na Mawphlang, la hap hiar arsut sha thie lyngba ki them bad ki lum ban kam ia ka wah Umiam ha ki maw kjat kiba la shna shtah bad pynlape bha ba la pyndait sbiak bad sbiak ban pynsuk ban iaid ki kulai u David Scott.
200 snem tam mynta, ha u snem 1820-1829, eiei, ha kito ki por, khlem pep kitei ki jaka, kin dei ki madan ialehkai mastieh ki mrad khlaw, kum ki dngiem, ki khiat, ki shrieh ki tngaw pynban u David Scott ula lah ban sorjamin thik thik. Kane ka lynti iaid kulai u David Scott ka don kumba 16-kilometre kaba u pyndonkam ban iaid na Assam sha ki rilum Khasi ha kito ki snem.
Ha kane ka sngi Saitjain, ka kynhun ki nongshong shnong na Wahkhen kynthup ki khynnah rit ba dang 10 snem haduh ki tymmen ba la 70 snem, ha ka jingialam u babu Kular Khongjirem, kila pyllong ia ka jingiaid kjat.
Ka jingheh ka lynti kulai u David Scott ka long kumba 3-4 phut eiei bad ha lynti don ki maw shongthait.
Ha lynter kane ka lynti iaid kjat, nyngkong hap ban jam ia ka wah Umiam ha kaba don ka jingkieng doi doi kaba la shna itynnad bha bad hadien kane, ka wah umtham, ka wah weilyngkut ha shnong Laitsohma bad sa kawei ka wah umiong.
Ha lynti kulai u David, la iohi ia ka jingitynnad ka mariang ba la ker ki jingjyrngam ka mariang hynrei don ki jaka ba ka lynti ka la shah pynmong noh na ka jingshna thang thliew rnga bad ka jingtih maw.
Ka lynti ka long kaba sngew tynnad namar kam da long thiep ne pynnoh hynrei ka long kaba sngew bang ban iaid ban iohi ia ka jinglong ka mariang bad katno tam ha kito ki snem ba u David Scottt u la iaid ha kane ka jaka, ban ioh mad ia ki er batesi ba beh hir hir ban pynthanda jai ia ka jabieng.
Kane ka lynti kulai u David Scott ka la long ka jaka iaid kai ki briew na kylleng man ka sngi. Ki don kiba iaid na Lad Mawphlang ban mih sha Mawphlang bad don pat kiba iaid na Mawphlang ban mih sha Lad Mawphlang.
Mar iabam ka jingiakop iaid kjat kiba la 70 snem bad kiba dang 10 snem ha lynti kulai ba 200 snem u David Scott
