Shillong: Ka sorkar jylla mynta ka sngi, ka la pyntreikam ia ka Mission 1000 Sngi, ban ai jingbam tei met ei ia ki khunlung bad ia ki longkmie naduh ba ki dang armet.
Kane ka prokram ka sorkar ka long ban pyllait ia ki khunlung, ki khynnah na ka jingbym biang bam na ka daw jong ka jingduk jingkyrduh. Ka thong ka sorkar ka long ban pynthikna ia ka jingheh jingsan ki khunlung ha ka bor met bad kumjuh ha ka bor jabieng.
Shi bynta jong kane ka prokram, ka sorkar ka la pynbeit pali ba u kpa ruh u dei ban leit rah ia ki khun shisien shi bnai sha jaka ba ai bam ha Aganwadi centre.
Ban pynlong ia kane ka prokram kaba jop, ka sorkar kan iatreilang bad ka shnong bad ki nongshong shnong.
Ha kane ka sngi, u myntri rangbah u Conrad Sangma ula pynbna ba la mang 127 klur ia kane ka prokram.
Haba iakren bad ki katto katne ki rangbah shnong kila kyrmen ba kane ka prokram kan long kaba jop. U sordar ka Pyndemumiong bah Bornard Syiem bad u Assistant Rangbah ka Mawiongrim bah OL Marbaniang kila ong ba lyngba kane ka prokram ki kyrmen ba ka thong jong ka sorkar kan long kaba jop ban iakhun ia ka jingbym biang ki khunlung ki khynnah bad ki longkmie ba armet.
U bah OL Marbaniang ula ong ba ki longkmie mynta kim ju ai buin shuh ia ki khun namar ba ki ai daw bym mih dud bad ba ki ong ba ka tyrkhong ka met bad kumne kumtai.
Ha ka jingshisha, hapoh hynriew bnai, ki longkmie ki dei ban ai beit da ka buin ia ki khun.
Ki kynthei mynta kim ju ai buiñ shuh ia ki khun | man u bnai yn hap leit rah khun u kpa sha Aganwadi
