Shillong: Mynta ka sngi, ki paidbah khamtam ki dkhot jong ka seng Hynniewtrep Youth Council (HYC) lem bad kiwei ki sengbhalang, kila wan poi khrui sha Sadar Police Station, Shillong ban synran ia u President ka HYC bah Roykupar Synrem uba dei ruh u chairman ka Confederation of Meghalaya Social Organisation (CoMSO), uba shah khot hajir ha ki pulit.
Kane ka jingshah khot hajir u bah Roykupar Synrem ka long halor ka jingkren jong u dang shen ha ka jingialang ka CoMSO ha Motphran ha ka 11 tarik Lber 2026 ban ai ka jingkyrshan ia ka jingiakhih ki paidbah Garo pyrshah ia ka jingioh shim bynta ki bym dei riewlum ne Non-Tribal sha ka District Council.
Haba kren sha ki lad pathai khubor u bah Roykupar Synrem ula pyntip ba ia ka ejahar ne FIR la ai da u SI u M Khardrwsaw jong ka Sadar PS pyrshah ia u. Ka jingshah khot hajir ka dei halor ka jingkynnoh ba la saphriang ka jingkren jong u ba u pyniapher niam ha ka jylla bad ha ka ri India bad kawei pat ka dei ka jingkren jong u ba un leit iarap ia ki Garo lada donkam wat ban rah tiar bad kane ka long kumba wanrah ia ka jingthut ha ka shongsuk shongsain.
Ki don kiwei kiba kren bein ia ka jaitbynriew Khasi hynrei ki pulit kim leh eiei katba ia ki Khasi ki kloi ban shim kam. Ula kyntu ia ka tnad pulit ba kam dei ban shah liang ban jied shiah tang iano iano hynrei dei ban leh kumjuh ia baroh.
Ba ujor FIR u SI ka Sadar ia ka jingkren ha Motphran, shah khot hajir u President HYC
