Shillong: Ka Umjarain hajan ka Mawkyrwat, South West Khasi Hills kaba don ka um shit kaba kyrsoi napoh ka mei ram ew ka la pawnam bha bad tan ia ki nongwankai kylleng ka jaka ym tang ban leit peit kai hynrei ban sum ruh.
Katkum ka jingiathuh ki briew, ia kane ka um, la lap u phareng mynshwa bad ka la nang paw katba nang mih ki sngi.
Kane ka um kaba kyrsoi napoh u mawsiang ka khluit tar tar kumba pynkhluid ha ka ding bad katkum ka jingiathuh ki briew, ka don ruh ka kynja ba long dawai ban pynkoit ia ki jingpang khamtam kiba baiong khlieh, kiba pang sniehdoh, kiba jrem met bad kiwei.
Ha kum kane ka aiom tlang, man ka sngi ki briew kila ia tuid sha katei ka jaka ban sum ban sait ia ka met bad ban pynjah ia ka jingjrem met bad ka jingpang met. Ka sngi u Blei bad ka sngi Saitjain bad ki dei kiba kham bun briew bha ban wan sum watla baroh shi taiew ki briew ki tuid lynter ter beit.
Ka don ka jaka sum ia ki shynrang bad kumjuh ia ki kynthei bad kawei ka pung kyllum kaba lah ban sum lang kaba la shna ha katei ka jaka.
La iohi ba da ki phew phew ngut ki briew kynthei bad shynrang kila ieng lain satar da ki kynta ban ioh sum ha kane ka um khluit.
Ia katei ka jaka la long trai ka riew shimet, ka kong Westilin Lyngkhoi.
Ha ka jingiakren bad ka kong Nandalin Lyngkhoi, kaba dei shi para ar kmie, ka la iathuh ba ka jingdon kane ka um shit ka la ai kam ia ki briew naduh kiba shong dukan, kiba ap bad kumjuh ia ka trai bri, ban kamai.
Jin lada kan bha lei ka surok, khlem pep, katei ka thain kan sa khring ia ki nongwankai. Hynrei kaba donkam ka long ban tehlakam ia ki briew kiba wan sum da kaba dih kyiad, buaid bad kane kam long kaba itynnad khamtam namar ba ka dei ka jaka jngohkai kaba wan baroh naduh ki khyllung khynnah, ki kynthei bad ki briew nabar jylla bad nabar ri. Ki bnai ba kham tuid bha ki briew ka dei ha ki bnai tlang.
Hynrei nalor ka um shit, katei ka jaka ha kliar um lum ba mih ka um khluid ha trai, ka don sa kawei ka jingphylla bad kata ka long ba mynstep u liput ne lyoh u shongkai sha them ha kaba lah ban peit kai kyndiar na jrong u lum Tongriang.
Hynrei namar ba ym pat bna paidbah, ia kane ka spah u liput ym pat paw pyrthei bha bad tang ki trai shnong kiba lah iohi ia kane.
Katei ka um shit kam khring tang ia ki briew kiba nabar hynrei ka long ruh kum ka spah ia ki nongshong shnong ha kaba kim donkam shuh ban tiew um sum hynrei ki leit sum beit ha katei ka um haba ki kwah sum.
Shwa ban poi sha ka um shit, ki briew ki iaid lyngba ruh iaka wah umngi, ha kaba kane ka wah kan dei kawei kaba khring ia ki briew ban shongkai bad bam lyer pynngad.
Kine ki dei tang ki katto katne ki spah ba ka mariang ka la ai kyrhai ha ka thain South West Khasi Hills hynrei kiba dang bun kyrhai kiba pynriew spah ia ki briew lada lah ban pynitynnad ha ka rukom kaba dei.
Ka um shit ka don bor dawai, bnaiong khlieh, pang snieh doh ka jem, sa u liput yn khring ka Umjarain ia ki nongwankai
