Shillong: Ka jingïalang ki la shim ia ki rai ban ym shah shuh ïa kino kino ki briew ki bym dei napoh u Bri Hynňiewtrep ban ïoh ïing wai hapoh kine ki 8 tylli ki Dorbar Shnong khlem da ïoh jingbit na ka Shnong
Kane ka jingïalang la khot kyrpang da ka Khasi Students’ Union – Laban Circle bad la ïashim bynta da ki Rangbah Shnong, Secretary Shnong bad ki Executive Members jong ki shnong bapher bapher jong ki Dorbar Shnong Madan & Riat Laban, Dorbar Shnong Laban, Dorbar Shnong Lawsohtun, Dorbar Shnong Upper Lumparing, Dorbar Shnong Lower Lumparing, Dorbar Shnong K.O.R, Dorbar Shnong Kynjat Phutbot bad Dorbar Shnong Lumshatsngi.
La don ryngkat ruh ki tnad pulit jong ka Laban Police Station bad Rilbong Beat House.
Ka jingïalang ki la shim ia ki rai ban ym shah shuh ïa kino kino ki briew ki bym dei napoh u Bri Hynňiewtrep ban ïoh ïing wai hapoh kine ki 8 tylli ki Dorbar Shnong khlem da ïoh jingbit na ka Shnong.
Kane kan kynthup ruh ïa ki ba trei bad kiba shong ba sah hapoh ki guest house bad ki dukan bapher bapher bad kumjuh ruh ïa ki nongbylla bar jylla kiba wan trei bad sah ha ki jaka trei ka jongki. Ki trai ïing/ trai dukan/ trai guest house/ kontraktor ki dei ban bud thik ïa ka adong shnong halor kane ka bynta bad lada don kino kino ki trai ïing kiba pynkheiň ïa kane, yn pynshitom ïa ki katkum ka rai jong ka Dorbar bad lada donkam ka shnong ka lah ruh ban pyntip sha ka Seng ne ki tnad pulit ban leh ïa kaba donkam.
Na ka liang ka Seng ka la kyntu ruh ba ki shnong ki dei ban pyntip ïa kane sha ki paidbah lyngba ki tynghung jingsawa.
Ki Dorbar Shnong ki don la ka jong ka rukom treikam ban pynrung kyrteng ïa ki nongshong shnong hynrei donkam pat ai ïa kino kino ki kot jingpynshisha hadien ba la pynshisha ïa ki kot ki sla ka jong ki khnang ban lah ban pynïapher hapdeng ki nongshong kiba pura bad kiba shu wan buhai shnong beaiň bad hap ban kiar na ka jingai kot pynshisha ïa ki briew ki bym don ka EPIC na ka jylla Meghalaya.
Ki bor pynïaid shnong lada lap ïa kino kino kiba sah beaiň hapoh ka Shnong, kin shim ïa ka sienjam ban pynmih ïa kum kine ki briew bad lada donkam ka shnong ka lah ruh ban pyntip sha ka Seng ne ki tnad pulit ban leh ïa kaba donkam.
Rai ki 8 shnong bad ka KSU ka thain Laban ban ym shah ai wai ia ki bym dei na bri 7trep
