Shillong: Ki nongialam ka Khasi Students Union (KSU) ki hiar sha Cachar District ka Assam ha ka 21 Tarik Nailar 2025 ki la hiar sha ka Shnong Kalakhal Silchar jong ka Jylla Assam hadien ba ki Khasi kiba shong ba sah ha katei ka jaka ki la shah thombor ha ki Runar Muslim da ki tiar pynmynsaw myn ha ka 15 Tarik mynta u bnai.
Ia kane ka kynhun, la ialam u President Rangbah Samla Lambokstarwell Marngar bad u General Secretary Samla Donald V. Thabah ryngkat ki dkhot ka Central Executive Council, ki Nongialam ka KSU West Jaintia Hills District Unit bad East Jaintia Hills District Unit kumjuh na Barack valley circle.
Ki nongialam ka seng ki kynduh ia ki Khasi Pnar ha kane ka thain ban iakren bad ai mynsiem ban iatylli barabor bad ka KSU kan ym iehnoh ia ki wat la ki shong ki sah shabar na ka Jylla.
Ha Shwa jong kane ka jingleit iuh kjat jong ka Seng ha katei ka shnong ka la don ka jingpyrshang ban khang lad ia da ki bor pulit ka Assam kiba la ap pahara ha katei ka jaka hynrei dei tad ynda haba ki Nongialam ka KSU, kila iakren ia u SP ka Cachar District, ba la shah ia ki nongialam bad dkhot ka KSU ban leit iakynduh ia ki nongshong shnong jong ka Kalakhal.
Ki Khasi ha shnong Kalakhal bad ki shnong ba marjan ki la pynpaw ia ka jingsngew shngain̈ bad sngew ioh mynsiem tang shu ioh jingtip ba ki nongialam ka KSU na Shillong kin wan ha ka shnong jongki.