Shillong: Ka Lok Sabha ha ka sngi Balang ka la mynjur ia ka ain Promotion and Regulation of Online Gaming Bill, 2025, na ka bynta ban pynwandur thymmai ia ka Online Gaming ha ka ri.
Kane ka ain ka long ban thew tarajur ia ka jingkiew sted ka India ha ka juk number ne digital technology kaban iaid ryngkat bad ka jingshngain jong ki paidbah, da kaba khang noh ia ki jait jingialehkai online gaming kiba iathong pisa bad ban kyntiew pat ia ki online gaming kiban kyntiew kum ka e-sports bad educational platforms.
Ia kane ka Bill ne ka ainrew la wanrah u myntri ka tnad Electronics & IT, u Ashwini Vaishnaw ha Parliament.
Ka juk technology ka la wanrah ka jingkylla ka bym lah shuh ban murdut bad kumta, ka donkam ruh ban tehlakam ia ka jingshah pyndonkam bakla ki samla, ki longïing longsem ruh.
Ha kane ka ain, ka sorkar kan ithuh bad kyntiew ia ki jingialehkai kiba khot kum ki E-sports, ban kyntiew ia ka imlang sahlang bad ka pule puthi ne kiba khot kum ki Social and Educational Games.
Kiba lah ban iashim bynta kin hap ban register katkum ka rta bad ki jingialehkai kin long kito kiban kyntiew ia ka pule puthi, ka lariti, bad ki sap ki phong jong ki samla.
Ka sorkar kan khang beit sbak ia ki jingialehkai kiba kamai bad iathong pisa ne kita ki Real-Money Online Games kum ki jingtyrwa pynbiej, ki jingpynbna ne advertising lane kiba pynkhring pynbrai, nangta kum ka rummy, poker, online lotteries, bad ki betting apps.
Ka la khang ruh ban iaphah pisa lyngba ka online ia kine ki jingialehkai kiba la mana.
Kiba ialeh pyrshah bad kiba pynkhein kin shah tan ha ka IT Act, 2000 bad kin shah dain kuna T.1 klur bad ka shong phatok kaban poi shaduh ka 3 snem bad kan kham jur lada ki bteng biang ban pynkhein.
Ka jingthmu ba kongsan kane ka ain, ka long ban khang lad ia ka jingbrai, ka jingduh pisa, ka jingpyniap hi haba kim lah siew ne duh ha ka jingialehkai bad ka jingpyndonkam ban kamai pisa da ka online ban bei pat ia ki kam lehnoh.
Ka sorkar ka la kam ba ki online gaming kiba iakhalai da ka pisa, kila pynbrai ia ki nongialehkai haduh ba kila jwat ban sangeh, bad kane ka la ialam sha ka jingdap ram ruh bad don kiba pyniap hi ialade namar kane ka daw nalor kata, ka dei ruh ka buit jong ki kynhun pyntriem ban pynmih pisa wat kiba nabar ka ri, bad kane ka la buh ka jingma ia ka jingshngain ka ri.
Khang ka sorkar ia ka online game, ka kuna ba da ki klur bad ka shong phatok
