Shillong: Ka sorkar India lyngba ka tnad DoNER ka la mynjur ban bei pisa haduh T.220 klur ha Sohra na ka bynta ban kyntiew shuh shuh ia ka kam jngohkai ha katei ka jaka kaba la pawnam ha ka pyrthei.
U myntri ka tnad DoNER u Jyotiraditya Scindia un wan ban buh maw nongrim ia kane ka projek ha Sohra ha ka por ba un iadon bynta lang ha ka tamasa Cherry Blossom kaban long ha u bnai Naiwieng mynta u snem.
U nongaiktien ka sorkar jylla, u bah Paul Lyngdoh ula pyntip mynta ka sngi ba kane ka projek ka long ka sienjam ba ka sorkar ka thrang ban kyntiew ia ka kam jngohkai ha nongkyndong.
U la pyntip ruh ba yn shna ia ka Heritage resort ha jaka ka Sericulture Farm, ha Lawsohtun kaba la seng naduh u snem 1925 da ka sorkar Bilat.
Kane ka projek kan iasnoh ia ka iew die jain ka jylla bad ka kam jngohkai bad yn pyndep hapoh ar snem.
Ha kawei ka liang, ka tnad Lariti ka jylla ka la bynshet ha u nongshna phlim ba pawnam ka jylla u bah Pradip Kurbah ba un pynkhreh ia ka khana ne script halor u Syiem khlawait ka jaitbynriew, u Tirot Sing Syiem ka Hima Nongkhlaw.
U bah Paul ula ong ba ka tnad Lariti ka la mynjur ban shna ia ka phlim kaba paka halor u Tirot Sing uba dei u nongialeh laitluid ka jaitbynriew bad na ka bynta kane, ka la bynshet ha u bah Pradip ba un pynkhreh khang ban pyntyllun ia ka kam shakhmat khnang ban pynsah nam ia ki riew khraw ka jylla.
Palat 200 klur ha Sohra, yn thoh khana u bah Pradip ia u Tirot Sing
