Shillong: Ka tnad elekshon ka ri India, ka Election Commission of India (ECI) ka la pynmih ia ka jingpynbna ba kito ki seng sain pyrthei ki bym ju iakhun elekshon shuh 6 snem kynthih, kiba hap ha Registered Unrecognized Political Parties (RUPP), kin shah mait ne shah pynduh noh.
Ki don 334 tylli ki seng sain pyrthei ha ka ri baroh kawei, kiba la shah mait ha ka Election Commission of India haduh mynta.
Saw tylli ki seng sain pyrthei kane ka jylla kynthup ka Khun Hynniewtrep National Awakening Movement (KHNAM), Meghalaya Democratic Party (MDP), North East Social Democratic Party (NESDP) bad ka Regional Democratic Secular Congress (RDSC) ki la shah pan jubab na u Chief Electoral officer (CEO) ka jylla, ha kaba kin shah khein iap noh kum ki seng sain pyrthei.
Lada ki dang kwah ban pynim, ki dei ban ai jubab ryngkat ki kot ki sla kiba biang shwa ka 26 tarik Nailar, 2025 bad kan shim bishar ha ka 2 tarik Nailur 2025.
Ia kane, la leh katkum ka jingpynkhuid ia ka rukom treikam jongka sain pyrthei kiba hap ha ka bor jong ka ECI.
Katkum ka kyrwoh kaba la pyllait ka ECI, ha Meghalaya ki don 4 tylli ki seng sain pyrthei napdeng 471 tylli kiban sa shah pynduh noh na ka bui ne ka register jong ka tnad elekshon ka ri.
Na ka 2854 tylli ki seng sain pyrthei kiba don ha ka ri, ki la hiar sha ka 2520 tylli bad ki lah ban nang hiar shuh shuh hadien ba ka tnad elekshon kan weng noh na ka register jongka ha kine ki sngi.
Katkum ka ain, ki seng sain pyrthei ki dei ban rejister ha ka Election Commission of India (ECI) katkum ka Rule 29A ka Representative of People Act 1951.
Na ka bynta kito ki seng sain pyrthei kiba khlem ialeh elekshon shuh haduh 6 snem kynthih, ka ECI kan pan jubab shwa bad kan sa shim ia ka rai lada dei ban weng noh na ka thup ruh.
Pan jubab ka ECI, lah ban shah khein iap noh ka KHNAN, MDP, NESDP, RDSC ha Meghalaya
