Shillong: Ha ka miet 10 tarik Nailar kumba ha ka por 7:30pm eiei, kawei ka Bolero Camper ML 04 D 8952 kaba niah u nongiah ba la buaid u Dominic Pasi (25 snem) ka la rat haduh 5 tylli ki kali kaba la wanrah ia ka jingmynsaw ki briew ruh nalor ka jingjulor ki kali.
Kane ka la jia ha Mihmyntdu ka West Jaiñtia Hills hajan ka Durbar Hall ha kaba kane ka Bolero Camper kaba niah u Dominic Pasi (25) uba na ka shnong Nongjngi kaba wan na thain Ladthalaboh ka la syllad shwa ia ka taiar dien kawei ka ML 01 7922 kaba wan na kawei ka liang, kaba dei ka kali ba pyndonkam u DTO East Jaiñtia Hills, Khlieriat bad u nongniah kane ka kali bad kiba shong kila lait thaw na ka jingmynsaw.
Hadien kane, kane ka Bolero Camper ka la pynher sted ka la tynrah sa ia ka Local Taxi number ML 04 D 7572 kaba niah u Pyndap Dhar, (27) na Ialong, ha kaba ka la julor jur bad u nongniah bad kiba shong kila mynsaw bad la pynkit sha Jowai Civil hospital Ialong.
Nangta kane ka Bolero ka bteng ban sylald ia kawei pat ka Breeza number ML 04 D 8095 na ka taiar dien kaba ieng ha katei ka jaka haduh ba ka la julor.
Hadien kane, u nongniah ula leit syllad sa ia ka local taxi ML 04 D 7427 kaba niah u Lakhon Khariah, (45) na shnong Nongjngi haduh ba ula mynsaw bad la pynkit sha Jowai Civil hospital Ialong.
Shuh shuh kane ka Bolero Camper ka la tynrah shuh sa ia ka local taxi number ML 04 A 0721 kaba ieng harud surok kaba la wanrah ia ka jingjulor na ka bynta shadien jongka.
Katkum ki pulit, une u nongniah u Dminic Pasi ula shoh khawyiang bad buaid kyiad bad ula niah khlem akor ia ka kali. Na ka liang ki pulit, kila shimti ia u bad la rah sha Jowai Civil hospital Ialong.
Baroh ki kali kiba shah tynrah dusmon ha kane ka Bolero camper la tan noh sha Police Reserve, Jowai bad ka jingtohkit ka dang iaid.
Rat ka Bolero Camper ba buaid u nongniah ia 5 tylli ki kali, bun ba poi sha hospital
