Shillong: Ka Ramakrishna Mission Vivekananda Cultural Centre, Quinton Road, Shillong, mynta ka sngi ka la pynlong ia ka prokram sam khusnam jong ka bynta kaba 51 jong ka Annual Cultural Competition, kaba long ruh kum ka jingpynkut ia ka jingrakhe kaba shi bnai ia ki sap, ka bor saindur jong ki samla bad ruh ka jinghiar pateng ka deiriti.
Ha ka jingiakhun mynta u snem la iashim bynta da 2,811 ngut ki khynnah na 82 tylli ki skul na Shillong bad ki jaka ba hajan ka sor, ha kaba ka jingiakhun ka la long naduh ka kyrdan ki khynnah nursery haduh ki khynnah kolej. Ha kane ka prokram, 285 ngut ki nongjop ki la ioh ia ki khusnam, ki syrnot bad ki jingiaroh. Army Public School, Shillong, ka la long ka lahduh katba ka Pine Mount School ka la wan ba ar.
Ha kane ka sngi la wan iashim bynta da ka Kong Rosetta Mary Kurbah, IAS, Deputy Commissioner, East Khasi Hills, Shillong, kum ka Kongsan. Ka la kdew sha ki kyntien jong u Swami Vivekananda ha kaba ka la ong, “Ka dei ka deiriti kaba iaineh katba dang iaid ka por,” bad ka la kdew sha ka bynta kaba khraw jong kum kine ki jingiakhun ban kyntiew ia ka mynsiem bad ruh ban wanrah ia ka jingieid ia ka deiriti ha kylleng ka India.
U Symbud Kongsan, Amit Kumar Gupta na ka India Tourism, ka tnad Kam Jngoh Kai, Shillong, u la iaroh ia kane ka Mission kaba la pynlong ia ka jingiakhun kaba heh haduh katne katne, kaba ai ka rynsan ia ki samla ba kin pyntbit shuh shuh ialade.
Ha shuwa kane, u Swami Divyaswarupananda Maharaj, Assistant Secretary jong ka Ramakrishna Mission, Shillong, u la ai ka jingren pdiang sngewbha bad u Swami Vedeshananda Maharaj u la ai ka jingkren ai jingsngewnguh.
Ka bynta kaba 51 jong ka Annual Cultural Competition ka la pyni biang ia ka jingkut jingmut ka Mission na ka bynta ka jingkyntiew ia ki samla, ka jingpyni ia ka sap saindur bad ka jingpynneh ia ka deiriti jong ka thain. Ka jingshitrhem jong ki nongiashim bynta bad ka jingiashim bynta ki nongwan peit ka la pynlong ia kane ka jingiakhun kum kawei na ki kam ba kongsan ha Shillong kiba iadei bad ka deiriti.
Pynlong ka Ramakrishna Mission ia ka jingiakop lariti 2025 ha Shillong
