Shillong: Hadien ka jingiaid kumba 7 ne 8 kynta eiei, ki nongiaid Yatra na ka kynhun riew ngeit Hindu kila wan poi ha jaka sahmiet ha shnong Phanniewlahneng.
Kumba 500 ngut eiei ki nongiaid kjat Yatra kila iashim bynta ha kane ka jingiaid yatra sha ka krem mawjymbuin ha Mawsynram.
Kine kiba iaid yatra ki kynthup naduh ki shynrang, ki kynthei kiba la rangbah, kiba dang samla bad kiba la kham met iaw ruh.
Ka jingiaid lynti jongki ka sdang na Mahadev Khola bad la don ruh ka jingdih sha sngi ha Mawngap bad nangne kila iaid beit sak shaduh Phanniewlahneng ban sah miet shwa ba kin mih pat dang step lashai ka sngi u blei shaduh krem mawjymbuin ha Mawsynram.
Ia kane ka jingiaid yatra jong ki riew ngeit Hindu, la synran lang ki pulit lynter ka lynti khnang ban ai ka jingshngain ia ki.
Kine ki nongiaid Yatra kin sa pynlong ka jingshah Miet ha Madan Iewtieh ha PhanÑiewlahneng ka Hima Lyngiong bad lashai ka 3 Tarik kin mih bad Bteng ka jingiaid kjat sha Krem Mawjymbuiñ Mawsynram East khasi hills.
Na ka liang ki nongialam ka HNYF kila leit jngoh ia ka pandal mynta ka sngi ha Phanniewlahneng bad kila bthah ia ki nongialam ka kynhun Yatra ba kim dei ban hylla ne kyrkait pathar haba ki iaid Yatra.
Iaid beit ka Yatra, iashim bynta kumba 500 ngut, yn sah miet ha Phanniewlahneng
