Shillong: Ki Nongialam niam bad ka sorkar jong ka jylla Meghalaya ryngkat bad U Myntri ba dei peit ia ka Tnad Social Welfare, U Bah Paul Lyngdoh ki la iakyduh lang ban iamir jingmut halor ka jing ia trei lang ban iakhun pyrshah ia ka jingdih drok ha Meghalaya. Kane ka jingialang ka la long hapoh ka jingialam u Principal Secretary & Development Commissioner, Shri. Sampath Kumar, IAS, ryngkat bad u DREAM Mission Director, Shri. F.G. Kharshing. Ka jingthmu ka long ban thaw lad halor ka jingpynduh ia u drok ha ka jylla bad ban ai jingsyllok bad jingkyrshan pat ia kito kiba la shah ktah ha kane ka jingdih drok.
Ki nongialam niam na ka Shillong All Faith Forum, kiba kynthup ruh ia ka balang Sikh, Seng Khasi, Catholic Mission, Seventh-day Adventist, bad Muslim, ki la kdew ia ka jingdonkam ban don ka jingïarap lyngba ka jingïai-ai jinghikai, ka jingbuddien kaba skhem, bad ki lad jingïarap ba wanrah ruh hapoh ki Dorbar Shnong.
U Myntri ba dei peit ia ka tnad Social Welfare, U Bah Paul Lyngdoh, u la pynpaw ia ki sienjam ba ka sorkar ka la shim ban iakhun pyrshah ia ka jingma ba u drok u wanrah, da kaba thaw ia ka Anti-Narcotics Task Force (ANTF) kaba don 40 ngut ki dkhot bad ka kam ba nyngkong eh jong ka ANTF ka long ban teh la kam ia ki jingeh kiba ki paidbah ki iakynduh haba ia dei bad ki jingdih drok. U la pynbna ruh ba yn pynkhlain biang ia ki Village Defence Parties (VDPs), da kaba pynkiew ia ka mang tyngka na ₹800 sha ₹3,000 na ka bynta uwei pa uwei u volunteer, ryngkat bad ki uniform bad ki tiar ba donkam.
U Shri. Sampath Kumar u la pynpaw ia ka jingangnud jong ka sorkar ban kyntiew ia ka jing ia trei lang jong ki niam ha ka jingtehlakam ia ki kam dih drok. U la pyntip ba ka sorkar ka la mang ₹50 lak na ka bynta ban kyrshan ia ki workshop, bad ki prokram pynsngewthuh paidbah hapoh ka Drug Reduction Elimination & Action Mission (DREAM ) Initiative, ha ka jingiatreilang bad ka Home & Political Department bad ka Social Welfare Department.
U Shri. F.G. Kharshing u la kyrpad ia ki nongialam niam ban iakhun pyrshah ia ka jingmaham kaba lah ban wan na ki liang kiba pher ba pher ia kiba shah ktah ha ka jingdih drok. U la ai nuksa ia kawei ka longïing kaba la buhrieh ia ka ka jingshem jingeh u khun jong ki uba la shah teh ha ka jingpynmlien ban dih ia u drok, namar ka jingmaham jong ka imlang sahlang. “Ka jingdih drok ka long ka jingpang, ym ka jingrem,” u la ong.
Kane ka jingïalang ka la wanrah lang ia ki ophisar sorkar bad ki nongialam niam na ki balang bapher bapher, da ka jingthmu ban pynkhlain shuh shuh ia ka jingïatreilang na ka bynta ka Jylla kaba lah ban lait na ka jingteh jingkhum jong u drok.