SHILLONG: U Myntri ba dei khmih ia ka tnat sam um ne PHE ka jylla u Marcuise N. Marak, u la kyntait ia ka jingkynnoh ba ka don ka jingbamsap ha ka jingpyntrei ia ka Jal Jeevan Mission ne JJM ha ki kato katne tylli ki shnong kiba dei shapoh Ri Lum Garo.
Haba iakren bad ki lad pathai khubor, u Marcuise u la kam pynban ba ka jingpyntreikam ka jylla ia ka JJM ka long kaba biang bha watla u la kubur, ba ki don ruh ki kam kiba lehse ki sahteng, namar ki katto katne ki daw ban pynbeit bad ki nongkitkam ia ki shnong.
U Marcuise u pynpaw ba da lei lei yn nym lah ban kynnoh ba ka don ka bamsap ha ka rukom pyntreikam ia ka skhim jong ka JJM hangne hapoh ka jylla.
Shuh shuh kum u Myntri, u la kyntu ia ki paidbah ba lada ki lap ne shem ba don kano kano ka rukom bym iaid biet ka rukom ban pyntreikam ia ka JJM, ki lah ban pyntip sha u, khnang ba ma u kum umyntri un lah ban bthah ia la ki ophisar ba kin leh ia kaei pat kaba donkam.
Ha kajuh ka por, u Myntri ka PHE u la pyntip ba uwei na ki ophisar jong ka tnat, u dang wad lad bad pule bniah kumno ban lah ban pynlang ne ban kynshew ia ka um slap kum shi bynta ban pynkyrsoi ia ki tyllong um bam um dih.
U Marcuise u la kam ba ia mynta ka tnat kam pat kwah ba kan pynpaw lut namar ba ka dang ailad ia la u jong u engineer ba un lah ban shna pynwandur bha ia kane ka jingwad bniah jong u, bad shisien ba la dep, ha katta ka por, un sa pyntip bad batai ruh sha ki paidbah.
Kumba ka long ia mynta, ka jylla ka la lait na ka jingma jong ka jingduna ka um, hadien ba ka aiom lyiur ka la sdang ba kan wan ha ka dur jong u slap uba la wan ban ther ha kine ki khyndiat sngi kiba la dep, tangba bunsien ka um slap kaba tuid na ki tnum iing jong ki briew, kham niar ban lah ban lum ne kynshew ia ka, kaba da kylla ka um baroh ka shu tuid kai lut noh sharud.
Ym don jingbam sap eiei ia ka JJM ha jylla, ong u myntri
