NEW DELHI: Ka Sorkar India ka la iasoh lang bad ka pyrthei ban rakhe ia ka International Sun Day mynta ka sngi, ka 3 tarik u Jymmang, 2024 kum ka jingpynkynmaw shisien shi snem shaphang ki jingiarap ka bording ba wan na ka sngi na ka bynta ka pyrthei kaba kham jyrngam bad kaba kham koit kham khiah.
Ha kane ka sngi, ka tnat New and Renewable Energy (MNRE), Sorkar India, ka la pynlong ia ka jingmareh marathon ‘Run for Sun’ ha Jawaharlal Nehru Stadium, New Delhi. Ka jingmareh marathon ‘Run for Sun’ kaba don ka jingiakop kaba 3 km bad 5 km ka dei kaba la saindur ban pynsaphriang jingtip shaphang ka bynta kaba khraw ba ka bording kaba ngi ioh na ka sngi ne ka bording solar ban pynduna ia ka jingkylla ka suinbneng bad ka jingkyntiew ia ka lawei kaba kham khuid bad kaba kham koit kham khiah ia baroh.
Kane ka jingmareh marathon ka la pyni ia ka jingieng skhem ka ri na ka bynta ka bording solar bad ka jingiaineh ka mariang. Ha kane ka sngi, u Secretary ka tnat New & Renewable Energy, Bhupinder S. Bhalla u la ong: “Kane ka prokram ka pyni ia ka jingieng skhem jong ngi ban kyntiew ia ki jait bording ba iaineh bad ka pyni ruh ia ka jingkongsan jong ka bording solar ha ka jingiaid lynti jong ngi sha ka jingpeit bniah ia ka mariang. Kane ka marathon ka iahap bha bad ka jing thmu jong ka Sorkar ban kyntiew ia ka jingkilan met bad ka bha ka miat, ha kaba ngi pynshlur ia ki briew jong ka ri ba kin long kiba smat ba sting katba ngi trei ruh na ka bynta ka bording na ki tyllong ba lah ban pynthymmai. Ngi ai jingsngewnguh ia baroh kiba iashim bynta kiba la ai ka jingkyrshan ban pynlong ia kane ka prokram kaba jop. Ngi khmih lynti ban iaid shakhmat na kane bad pynskhem ia ka kum ka lympung ka ban long man u snem.”
Pynlong ka Sorkar ia ka jingmareh ‘Run for Sun’ ha New Delhi ban rakhe ia ka International Sun Day
