NONGPOH: Tang hadien shi sngi shwa ban sdang ka jingïakop ïalehkai sports ka District Level Inter School Athletic Meet 2024 jong ki skul bapher bapher hapoh Ribhoi District, naka liang ka tnad District Sports Ophisar ka la pynbna paidbah ba kan pyn sangeh noh shwa ïa kane ka lympung ïalehkai sports namar ka jingjur palat ka jing shit hapoh Ribhoi.
Haba kren sha ki lada pathai khubor, u Bah Bobby L Nongbet, District Sports Ophisar ka Ribhoi, u la ïathuh ba tang shi sngi shwa ba ngin sdang noh ïa kane ka lympung kum ba la buh ryntih kata haka 1 tarik haduh 3 tarik, naka liang u Deputy Commissioner ka Ribhoi u la bthah ïaka tnad Sports ba kan hap ban pynsangeh noh shwa ïa kane ka lympung namar ba jur palat ka jingshit.
U la ïathuh ruh ba haka jingshisha naka liang ka tnad Sports ki la long ba pynkhreh ban sdang noh ïa katei ka lympung lashai ka sngi hynrei hadien ba la wan ka jingbthah naka liang u Deputy Commissioner ka Ribhoi ki hap ban pynsangeh noh shwa. U DSO la Ribhoi u la kyntu ïa baroh ki rang bad ko thei ïalehkai kiba thmu ban ïa shim bynta ba kim dei ban duh mynsiem hynrei ki dei ban nang ïai trei shitom bad minot shuh shuh bad naka liang ka ophis u DSO kin sa pyntikna ïaka tarik ba kin sdang.
U Bah Bobby L Nongbet u la kyntu ruh ïa baroh ki khynnah ba kim dei ban kheiñ sting ïa kane ka jingshit hynrei ki dei ban ïada ïalade bad ban bud ryntih katkum ki jingbthah khnang ba kan nym Don kano kano ka jingktah ïaka bor met.
Hadien ba la dep pynkhreh, hap kynriah ïaka tarik Lehkai ki Skul namar ka jingshit
