NONGPOH: Ka Lympung ïalehkai basketball kaba la tip kum ka Berchem Cup Open Meghalaya Basketball Tournament kaba saw kaba la pynïaid daka Seng Samla Nongpoh Proper ka la poi noh sha ka ba kut hapdeng ka jingïakhun phainal ka Dubakh A pyrshah ïaka SYM jong ki kynthei bad ka Nongpoh A pyrshah ïaka Monarchs jong ki shynrang.
Ha kane ka jingïakhun ban knieh ïaka nam laduh ka la long shi sha kaba shongshit bad kaba la pynhun ïaki khmat jong ki paidbah kiba la wan peitkai bad ban ai jing kyrshan ïa la ka jong ka kynhun.
Ha kane ka sngi phainal la ïoh nyngkong ïaka jingïaleh jong ki kynthei kaba la long hapdeng ka Dubakh A pyrshah ïaka SYM bad ha bakut jong ka jingïalehkai ka Dubakh-A ka la lah ban pynliem noh ïaka SYM da 67 basket la 50 basket. Bad haka jingïalehkai jong ki shynrang ka Nongpoh-A ka ba long la trai madan ka la shah pynliem noh haka Monarch da 100 basket la 64 basket.
Haba kut jong ka jingïalehkai naka liang ka Seng Samla ka la sam daki khusnam sha ki nongjop kiba kynthup naduh ki khusnam shimet bad kiwei kiwei. Bad ka kynhun lahduh jong ki shynrang ka la rah ïaka song pisa kaba 70 hajar tyngka bad kaba wan baar ka la ïoh ban rah ïaka song pisa kaba 40 hajar tyngka. Bad naka liang ki kynthei ka lahduh ka la rah ïaka song pisa kaba 40 hajar tyngka bad kaba wan baar ka la rah ïaka song pisa kaba 20 hajar tyngka.
Ha katei ka sngi la wan ban pynshngaiñ lang naduh u President ka KSU u bah Ferdinald Kharkamni kum u kongsan, u bah Luistar Lyngdoh President ka FKJGP kum u symbud kongsan, u bah Marcus Marten President ka HNYF, u bah Silvestar mynsong Rangbah Shnong Nongpoh lem bad kiwei kiwei ki riew rangbah.
Rah ka Samla Bashi bad u Lalnunsanga ïaka nam MVP
