MAWLAM: Ka shad Lyngdoh ka Raid Mawlam ka dei kawei kaba paw bad kaba heh ha ka thain Riwar.
Ha kane ka sngi Saitjain, la sakhi ia ka jingphuh jingphieng kane ka shad kaba ju pyllong man u snem ha u bnai Lber ne Iaiong, kumba la buh la shor u longshwa manshwa. Lah ban ong ba kane ka shad ka lah ban kham heh wat ia ka shad suk mynsiem ka seng Khasi Kmie ha madan Weiking ha ka jingbun ki nongiashim bynta ban shad. Ha kane ka snem, ka Shad Lyngdoh ka Raid Mawlam ka la sakhi ia ka jingdon haduh 1400 ngut eiei ki nongiashim bynta ha ka shad kynthup ki kynthei bad shynrang.
U sordar ka Raid Mawlam u bah Mani Mawpat haba iathuh halor kane ka shad, ula iathuh ba shwa ban poi ka sngi shad, ka don shwa ka knia ka khriam da ki syiar, pylleng bad ka jingpynieng ia u dieng doh katkum ka niam ka rukom kumba la buh u longshwa manshwa.
Ula ong ba ha kane ka shad, kam don kano kano ka jingkhang ia kiba kwah ban iashim bynta wat kiba la kylla sha kawei ka jingngeit ruh, lada ki dei ki Khasi ki lah ban iashim bynta shitrhem ha kane ka shad.
“Ha ka jinglehniam ngi ai nguh ia ki Blei jong ka Raid, kiba la pynneh pynsah naduh kulong kumah, ki mei tymmen, ki pa tymmen jong ngi”, la ong u Sordar.
Ula ong ruh ba ka Raid ka ainguh ruh ia u Biskorom uba la hikai ia ka ksing ka dhah, ka put ka tem ban phuh ban phieng ka shad ka kmen.
U bah Mani ula ong ba wat la ka dei ka shad niam hynrei ym da donkam ban kren ia kata, namar ba ha kane ka shad, uno uno uba dei u Khasi u lah ban iashim bynta ha ka shad.
Ha kane ka shad, la wan skhi lang u symbud myntri rangbah uba dei na ka thain u bah Prestone Tynsong, ka Executive Member ka KHADC ka kong Grace Mary Kharpuri, u syiem Khynnah ka Hima Khyrim, u Paiem Habapan Syiem nalor ki nongkitkam na ki shnong bad ki Raid ha ka thain bad u paidbah byllien.
Phuh ka Shad Lyngdoh Raid Mawlam, palat 1400 ngut wan iashim bynta ki nongshad
