SHILLONG: Ka jingioh laitlan ki bar jylla ban shong ban sah ban thaw shnong hapoh sor Shillong ka la pynlong ia ka seng Hynniewtrep Youth Council (HYC) ban sngewkhia bad mynta ka sngi Palei 25 tarik Ïaïong ki nongialam ka HYC sengkmie ki la leit ban jurip ia kawei ka jaka ba ki bar jylla ki la pynlong shnong hajan ka Ajmera kaba don sha lyndet ka Them Ïewmawlong.
Ha kane ka jingleit ka HYC la lap ba katei ka jaka ka long kaba isaidmet bha, bad la lap ruh ba ki bar jylla ki la shong beaiñ ha katei ka jaka.
U president ka HYC, u Bah Roykupar Synrem u la ong ba ka seng kan tied shwa ia ki trai jaka, namar katei ka jingthaw shnong beaiñ kadei ha u pud jong ka Shillong Municipal Board bad a Shillong Contonment Board. U la ong ka ka seng kan dawa na ki bor ka Contonment bad ki dei ban weng ia kiba shong ba sah beaiñ ha katei ka jaka, bad ong shuh ba ka seng kan dawa ruh na ki bor sorkar ban shim kam halor kane ka jingthaw shnong beaiñ, namar kan buh jingma ia ki nongshong shnong ka jylla.
U la iathuh ba ki don ruh ki Nongdie drug kiba sah ha katei ka jaka bad mar dyniohi ia ki dkhot ka seng ki la phet krad noh, bad kane ka paw ba kadei ka ktem ki kam sniew. U la iathuh ba ka seng kan buddien ia kine ki briew ba kim dei ban ioh sah ha katei ka jaka.
Katkum ka jinglap ka HYC ki ïing kiba doh hapoh shispah tylli ha katei ka jaka ki ioh ruh ia ka Bording electric, bad ka seng ka buh jingkylli ruh ia ka MeECL kaba leh shiliang da kaba ai ei ia ka Bording da ki phew snem, bad balei ki bor sorkar ki leh matlah ia kitei ki briew ba sah beaiñ da ki phew snem.
U Bah Synrem u la iathuh ba ka jingjurip ia katei ka jaka ka long hadien ba ka seng ka la ioh bun ki jingujor namar ka long ka bym shngaiñ ia kiwei ki nongshong shnong kiba iaid ba ïeng na jan katei ka jaka.
Thaw shnong beaiñ ki poiei ha lyndet Them Ïewmawlong, lap ka HYC ba don ruh ki poiwir bad ki nongdie drok
