SHILLONG: Ka seng ki shipai ba la shongthait, kaba kynthup ia ki shipai ryngkew, shipai duriaw and shipai liengsuin, ba la tip kum ka Meghalaya Ex-Service Men League, hynnin ka sngi, ka laioh ban pynshai ia ki dkhot jong ka, kynthup ruh ia ki kurim jong ki bad ia ki khun bym don kpa halor ki jingmyntoi ba ka Sorkar Pdeng ka ai bad ruh ia ki jingeh ba kane ka seng ia kynduh.
Kine ki jingmyntoi kim dei tang na ka bynta jong ki shipai ba la shong thait, hynrei ki tuid ruh ia ki kurim bad ki khun jong ki. Ia kine ki jingpynshai la ioh ban ai ha ka jingialang jong ka seng ba la pyllong ha Umlyngkai Community Hall, Umlyngka. Ha kane ka sngi, la ioh ruh ban jied ia ki nongkit kam bathymmai jong ka Meghalaya Ex-Service Men League. Kine ki nongkitkam ki long u Ex Hav, u Bah Shailut Syiemlieh kum u President, Ex NK u Bah Shngainlang Thangkhiew kum u Vice President, Ex NK u Bah Buam Myrchiang kum u General Secretary, uba la bat ia kane ka kam mynta la saw snem kynthih, Ex NK u Bah K.S. Marwein kum u Assistant General Secretary bad Ex NK u Bah Lam Bor Nongkhlaw kum u Finance Secretary. Haba kren ha katei ka sngi, u President ka seng, u Bah Shailut Syiemlieh u la kyntu ia ki dkhot jong ka seng ba ki dei ban pynshlur ia ki khun ha ki kam ialehkai bad ba kin ai ruh ia ka jingshakri jong ki na ka bynta ban kyntiew ia ka bha ka miat ha ka
imlang sahlang.
Na ka liang jong u Vice President, u Bah Shngianlang Thangkhiew, u la ai jingmut ba dei ban pynkup burom ia ki dkhot ong ka Executive Committee ha kaba kut jong ka term na ka bynta ka jingai ia ka jingshakri jong ki. Na ka liang jong u U General Secretary, u Bah Buam Myrchiang u la pynpaw ia ka jingsngewkhia halor ka jingbym shim khia jong ki dkhot jong ka seng ba kin ioh lut ia ka jingmyntoi ba ka Sorkar Pdeng ka ai na ka bynta jong u. Une u rangbah u la pynshai shuh shuh bad a kaba ong ba ki kot ki sla bad kiwei ki dulir kim dei ban don wat tang iwei i jingbakla. U la ong ba lada don tang iwei ki jingbakla ha ka pynpdap ia ki jingtip bad ki dulit bap hah, ka Sorkar kan ym la ban ai ia kito ki jingmyntoi. Une u rangbah ula iathuh ruh ba ki khun jong ki shipai ba la shongthait ki lah ban ioh lem ia ka pension lada kim pat shongkurim lane lada jia ba ki kurim jong ki, ki la khladnoh. U Bah Buam Myrchiang u la iathuh ruh ba ka long ka Sorkar ka ai ia kiba bun ki jingiarap na ka bynta jong ki, kum ka baiskul, baiiathoh, ka jingiarap ia ki khunswet kynthei kiba ym pat shongkurim, ki jingiarap pisa na ka bynta ban pyndep ia ki kam iap briew na ka Zila Sainik Welfare, Station Cell, CSD Cantee (ADLRS), ka jingiarap na ka bynta jong kito ki shipai kiba la iehnoh kam hadien ba ki la dap 65 snem ka rta kaba T.48,000 shi snem bad ka P.M. Ex-Service Scholarship Scheme na ka bynta kito kiba pule doctor bad engineer. Kawei pat ka jingioh myntoi ka long ka One Rank One Pension Scheme, kaba pyniaryngkat ia ka ha man la ka san snem ka juh ka kyrdan bad ka snem trei kam bad pynryngkat ia ka juk ka pension. Ki shipai ba la shongthait, ki la iakhun ia kane ka jingioh myntoi mynta la 42 snem khlem kano kano ka jingsei soh. Kine ki shipai ki la ioh ia ka One Rank One Pension (OROP-I) ha ka snem 2014, ia ka OROP-II ki la ioh ha ka snem 2019 bad ia ka OROP-III kin ioh naduh u Naitung 2024.
Ai jingpynshai ka Meghalaya Ex-Service Men League
