SHILLONG: U nongaiktien ka BJP Meghalaya, u bah Mariahom Kharkhrang u la ong ba ka jingkyrshan ka BJP ia ki kyrtong ka NPP ha Meghalaya kam dei kaba bakla bad kaba dang thymmai namar ba ka NPP ruh ka don ha ka shatri ka North East Democratic Alliance (NEDA) bad kumjuh ha ka sorkar pdeng.
Haba kren mynta ka sngi, u bah Mariahom u la ong ba watla ki don katta katno ki dkhot kiba phet noh hadien ba ka seng kmie ka la pynbna ban kyrshan ia ki kyrtong ka NPP na Shillong bad na Tura, hynrei kam don kano kano ka jingphet paidbah. U la ong ba ha ka por elekshon, ki don ki jingiakynnoh iakynthah hapdeng ki seng sain pyrthei hynrei ka ju dei hi ka rukom bad kam don jingpher eiei.
“Ka NPP ka don lang ha ka NEDA bad ka BJP bad kumjuh ha ka sorkar pdeng, kam dei kaba thymmai, tangba ha ka por elekshon, baroh baroh ki ia wad daw bad iakynnoh iakynthah”, la ong u bah Mariahom.
Ha kajuh ka por, ula kyntait ia ka jingmih khubor ba don ka jingdawa hiar shuki ia u President ka BJP u Rikman Momin halor ka jingrai ka party ban ym pyniakhun kyrtong MP ha kane ka elekshon sha ka Lok Sabha.
U bah Mariahom u la ong ba katkum ka jinglum jingtip ki nongialam ka BJP na seng kmie, ki sngew ba ka party ka lah ban shem jingeh ban poi sha ka thong na Shillong bad na Tura bad na kata ka daw, kila rai ban shu kyrshan ia ka NPP kaba dei ka paralok ha ka NDA, khnang ba kan ym lait ei shano shano.
Ka jingkyrshan ka BJP ia ka NPP kam dei kaba thymmai, la iadon lang ha ka NEDA
