SHILLONG: Ka jingialehkai kynjatbol ka dei ka ktien jong baroh ha ka pyrthei, bad ka khring lut naduh kiba dang lung haduh ki samla bad haduh kiba la iaw ka rta ruh kumjuh. La ju ong ba ha ka jingialehkai kynjatbol, ym don pud ba lah ban khang na kawei ka ri sha kawei pat.
Kane ka jia, hangne ruh ha ri Khasi-Jaintia, kaba ieid bha ia ka jingialehkai kynjatbol. U hep rit ka Mawryngkneng, u don ka sap kyrpang bad ka jingthrang ban long kum u nongialehkai nongapkol ne goalkeeper ba pawnam ha ka pyrthei. Une u heprit u dei u Samborlang Rynjah uba dang 6 snem ka rta, na shnong Main Road, Mawryngkneng, East Khasi Hills, bad u don ka sap kaba kham satar na kiwei ki khynnah bad, kata ka long ba u kwah ban long u nongapkol uba tbit bha, kum u nongapkol ka ri Argentina u Damián Emiliano Martínez Romero, uba ioh ia ka khusnam Best Goalkeeper ha ka FIFA World Cup 2022 ha Qatar.
U heprit Samborlang u dei u khun baar jong I kong Kyntiewlang Rynjah, bad u pule klas 1 ha Rising Sun Secondary School, Mawryngkneng.
Na ka liang u t7 news, u la ioh ban iakynduh ia une u heprit ha iing sah jong u. Ha ka jingkren bad I kmie jong u, I kong Kyntiewlang ila iathuh ba u Samborlang u la sdang ban pyni sap kum u nongapkol naduh ba u dang don 2 snem ka rta bad katba nang heh, ula nang shlur ban kem ia ka bol. Kaba kham sngew phylla, ka long ba u Samborlang um tieng ban kem ia ka bol lada kynjat kiba la heh ruh bad lada kynjat ki para khynnah lei, u niom bad kem beit krop-krop bad tied ruh dain dain syriem kum ki nongapkol kiba la rangbah bad kiba la tbit bha.
Ia ka sap jong u, la iohi haba u ialehkai ha phyllaw iing lajong kaba rit bad la pynieng da ki diengkol ban ialehkai bad u hymmen bad ki paralok khynnah jong u.
Kiba haiing bad I kmie jong u, ki kwah ban pynshlur ia une u heprit ha kane ka sap kaba u don hynrei, ki shem jingeh shano ban phah, bad kumno ban leh, namar ba kim tip ia ka lynti, khamtam namar ba ki duna kim don spah kim don phew ban phah leit pyntbit kumba long kiwei. Ki kyrpad ba lada don kiba tip lad, ba kin kdew lynti khnang ba kin ioh ban ialam lynti ia une u hep rit.
U heprit ba 6 snem na Mawryngkneng u kem bol kum u nongapkol ka ri Argentina
