WAHKHEN: Lehse bun ki shnong kiba la duh noh ia ki rukom leh rukom im kiba ioh pateng naduh ki longshwa manshwa, hynrei ka shnong kaba don ha them ka riwar, ka wah mru ne wahrew, ka dang don kyrhai ka spah lariti.
Ha ka 23 tarik Lber 2024, ka Sieng Riti Institute, Wahkhen kala pyllong ia ka jingpyni lariti ne ka cultural show kiba ju don ju leh ha ka shnong naduh mynshwa hyndai haduh kine ki sngi.
Naduh ka pynshad khun u kpa bad ka kmie, ka tied kdor ban beh ia ki mrad ba pynjot ia ki jingthung, ka shoh krai ryngkat ka phawar, ka shad mastieh, ka leit shaw meikha, la sakhi ia ka jingpyni na ki khynnah ka Sieng Riti Institute, nalor ki longkmie, ki samla.
Nangta, ka ksing lumpaid, sha ka shad skaiñ, sha ka shad kiew ing thymmai, kala pynsawa bad khring ia ka jingmut jingpyrkhat, ka mynsiem jong ki paidbah kiba la wan ban sakhi ha kane ka sngi, ban iohi ia ki jingleh bapher bapher kiba don ha shnong Wahkhen, jong ka jingriew spah ka lariti.
Ia kane ka jingpyni lariti, ka dei shi bynta ban leh burom ia ka jingithuh ka sorkar jylla mynshem ar snem ia ka shnong Wahkhen kum ka pneh ka lariti kaba mut ka tem ka put, ka siaw ka rwai tynrai bad kiwei ki rukom leh.
Ha kane ka sngi, la sakhi lang ka kong Cordilia Thangkhiew, Programme Executive ka Akashwani, Shillong, iba la iaroh ia kane ka lariti jong ka shnong, ban kyntiew shuh shuh ha ka jingriew spah ia ka lariti.
La ioh ruh ia ka jingkren na u sordar ka Raid Wahkhen, bah Jansing Tynsong, kumjuh u Adviser ka Sieng Riti Institute, babu Kular Khongjirem.
Ka shnong Wahkhen ka pneh ka Lariti ka jaitbynriew-na ka tied kdor sha ka shoh krai bad kiwei
