SHILLONG: Ka Meghalaya Energy Power Generation Corporation Limited (MePGCL) kala pynbna ba kan khang iaid kali na ka jingkieng Umiam (Damsite) naduh ka 31 tarik Lber haduh ka 8 tarik Ïaiong namar ka jingmaramot ia ka jingkieng.
Katkum ka jingpynbna ba la pynmih la pyntip ba ha ka 31 tarik Lber, ka jingkhang ban iaid kali kan treikam hynriew kynta kata naduh ka por 8 baje mynstep haduh ka por 2 baje janmiet. La ong ba tang ki Ambulance yn shah ban iaid ha kane ka por.
Ka MePGCL ka pyntip ruh ba hadien bala dep pyntrei ia ka kam, yn sa plie noh ia shiliang jong ka surok ba sharum jong ka wah ban iaid ki kali kiba khia hapoh ka 4 ton.
Ka jingplie ia shiliang ka surok kan long ha baroh kine ki phra sngi haduh ka por 7 baje mynstep jong ka 8 tarik Iaiong.
Kala pyntip ruh ba hadien ka 8 tarik Iaiong, hadien ka por 7 baje mynstep, yn sa shah ban iaid sa ia ki kali kiba hapoh ka 15 ton na ka surok kaba sharum sha ka liang jong ka wah.
Katkum ka jingpynbna na ka MePGCL, la kyntu ia ki Deputy Commissioner ka East Khasi Hills bad Ri-Bhoi District ban pynbeit ia ki jaka ban ïeng ki kali hashuwa ban poi sha ka thain jong ka dam hapdeng ka por 8 baje mynstep haduh 2 baje janmiet jong ka 31 tarik Lber. Ha kajuh ka por la kyntu ruh ia ka Tnad PWD ba kan shong bishar bad pynbeit da kiwei pat ki lynti iaid ha ka por jong ka jingkhang iaid kali na jingkieng dam.