SHILLONG: U Deputy Chief Executive Member ka KHADC u bah Pynshngain N Syiem ula ong ba ym pat lah ban iathuh bniah lano ka Delimitation Committee kan pyndep ia ka kam jongka, ban pynwandur ia ki konstitwensi.
Haba jubab ia ka jingkylli ba la wanrah u MDC ka Mawthadraishan, u bah Jambor War ha ka dorbar mang tyngka ka KHADC, u la ong ba watla ka la don ka jingsngap paidbah ia ki konstitwensi bapher bapher hynrei kam pat wan ka jingthoh na ka Delimitation Committee sha ka Executive Committee.
U la ong ba ka jingthmu ka EC ban pynbeit ia ki konstitwensi ha ka por ba biang hynrei namar ba ka Delimitation Committee kam lah ban pyndep hapoh ka por, ka la phah sha ka sorkar, bad ka sorkar jylla ka la rai ban pynjlan ia ka samoi treikam ka KHADC.
U Deputy Chief Executive Member ula ong ba ka sorkar kala thoh sha ka Council ban phah noh ia ka jingpyndep ia ka jingpynbeit ia ki konstitwensi hynrei namar ba ka Delimitation Committee kam pat dep, kala pan por bym pat dep ia ka kam bad ka rai ban pynjlan ka shong ha ka sorkar.
Ka jingpynjlan ia ka samoi ki MDC, ka shong ha ka sorkar, ong u bah Pynshngain
