SHILLONG: U Chief Executive Member ka KHADC u bah Pyniaid sing Syiem u la ong ba ka Council ka la pynkhreh ban thaw lad ban pynmih khajna shuh na ka kam jngohkai kiba dei na ka lariti ne cultural tourism bad ban pynkylla ia ka ophis ka KHADC kaba don mynta ha ka jaka iew hadien ba la rah ia ka ophis ka Council sha jaka thymmmai sha New Shillong Township.
Haba kren halor ki lad pynmih pisa ban pyndap ia ki jingdonkam ka Council, u bah Pyniaid u la ong ba ka Council kan iatreilang bad ki bor Hima, ki Raid ne ki shnong ban pynbha, ban pynitynnad ia ki jaka hyndai khnang ban pyllong ia ki kum ki jaka jngohkai pyrthei, ban khring ia ki briew shi bynta ban pynioh khajna ia ka Council.
Kawei pat ka lad ban pynmih khajna shuh ia ka Council ka long ban pynkylla ia ka jaka kaba don ka ophis ka KHADC mynta sha ka jaka iew, ynda la dep ban shna ia ka ophis kaba thymmai sha Sor Shillong Thymmai.
Katkum ka jingong u CEM, ka sorkar jylla lyngba ka tnad pynroi sor ka la ai jaka ha thain Mawkhanu hynrei, namar ba ka kham jngai, ka Council ka la pyrshang ban iakren ban ai sha jaka kaba kham don hajan.
Na ka kam jngohkai bad iew complex, yn pynmih khajna shuh ka KHADC
