SHILLONG: U myntri rangbah ka jylla u Conrad K Sangma u la plie ia u maw nongrim ban shna ia ka madan phlang plastic kaba T.10.93 klur ha shnong Umbuda, Ri-Bhoi ha kane ka sngi Nyngkong.
La sakhi lang u myntri ka tnad ialehkai bah Shakliar Warjri, nalor kiwei ki nongialam shnong bad ki paidbah.
Haba kren ha kane ka jingialang plie mawnongrim, u Conrad u la ong ba ka sorkar ka la pyntreikam kumba T.700 klur ban shna ia ki madan bad ban pynbiang ia ki tiar ialehkai bad kumba T.400 klur la mang ha ka snem ban wan.
Ula pyntip ruh ba ka sorkar ka la mang T. 2800 klur ia ki samla, ban kyntiew ha ki kam ialehkai, ka put ka tem, ka lariti bad kiwei ki kam ba kin ieng ha la kijong ki kjat.
“Kumba 20 tylli ki madan phlang plastic yn sa shna ha ki jaka nongkyndong ha ka jylla”, la ong u Conrad.
Ka Ribhoi district kan sa ioh shen ia ka madan stadium kaba biang nadong shadong.