SHILLONG: U Superintendent of Police ba khmih ia ka kam pyniaid kali, mynta ka 6 tarik Lber 2024, u la lum ia ka jingialang hapdeng ki Khasi Hills Bazar Bus Association bad ka Shillong Municipal Board na bynta ban pynbeit ia ka jingdheng kali ha them Iew Mawlong namar ka jingieng pynhap tiar ki trok ha katei ka jaka.
U General Secretary ka Khasi Hills Bazar Bus Association u bah Kyrshan Rynjah haba kren sha ki lad pathai khubor hadien ka jingiakynduh ia u SP Traffic, u la ong ba ka jingkhot jong u SP ka Traffic ia ki bad ki nongtrei jong ka Municipal ka long ban pynbeit ia ka por ba ki trok ki dei ban mih bad pynhap ia ki tiar ki tar ha katei ka jaka hapoh ka 9 baje mynstep khnang ba ki draibar bos jong kin nym iakynduh jingeh namar ka jingieng ki trok bad kan nym pynwit ia ka jingiaid kiwei de ki kali.
Katkum ka jong u bah Kyrshan, na ka liang ka Municipal ki la pynsngew ba kin ai ka jingiatreilang bad Association lem bad ki traffic bad la buh por ruh ba ki trok kiba wan pynhap tiar kidei ban ialeh ban pyndep noh hapoh ka 9 baje mynstep bad lada kim lah ban dep hapoh kane ka por kidei kin lah ban bteng biang hadien ka por 3 baje janmiet .
Ha kajuh ka por u la ong ba ka jingkhapniah ka lynti synkein kadei namar ka jingdon kiwei ki kali rit ka la pynkhapngiah.
U la bynrap, hadien habud lada kum kane ka jingeh ka dang iai don, kin sa shim da kiwei ki lad ki lynti bad kin sa shong biang ia ka jingialang na bynta ban shim da kiwei ki lad ki lynti khnang ban wanrah ka shongsuk shongsain ia baroh kiba im kamai jakpoh na kane ka kam .
Lum u SP ia ki nongniah bos bad ka Municipal ba wit ki trok ia ki kali kamai ha Iewmawlong
